Catch 135 《Catchy 畫公仔畫出腸》

你有幾多個IG a/c呢？一個公開，一個close friends ？公開嘅一個，可能係為咗應酬個世界，或者想吸多啲like，close friends嘅哩一個，可能係想放飛自我之時有人陪。咁個a/c名你會點改㗎？公開果個會唔會同打機a/c果個名一樣呢？定係完全唔關事呢？今期有得slash，所以我哋喺cover story度寫得件事好正面，然後決定喺catchy度瘋狂地放負，即係公開a/c同埋close friend a/c咁囉。（不過Catch真係有人睇咩？公開a/c都係close friends咁扮一體兩面好似好怪喎。）

今期一開始其實係想討論下，好流行嘅slasher其實係咩，想鼓勵下大家有多啲想像力，唔好被一個身分限死。但做落、傾落、寫落，同一個字，有人講緊職業，有人就覺得係身分角色定位，咁即係點呢？如果只係講多種身分，其實都幾悶喎。應該好耐之前，好多期都講緊生命嘅複雜性，唔應該咁單一化絕對化。就如同三位一體的父、子、靈，或者耶穌自己又道路又真理又生命，又或者門徒又做光又做鹽，人有多重身分係幾千年嘅現實，真係無咩好講。

咁關於職業就更加無謂講啦，對獨一無異、單一專業所有嘅迷思同迷戀，後現代早就將所有幻想破滅，到咗疫情後就更加知道，哩啲專心專一嘅畫面當然係好靚，但當中犧牲咗幾多其他嘢，就無需係度多講。近年日系「次文化」AGCN（ 動畫／遊戲／漫畫／小說）都很流行帶著記憶轉生到異世界，而穿越亦都一早成為咗中國網絡小說其中一個大分類。所謂的slasher其實都係咁啦？因為兼任咗幾種身份，所以可以係某種狀況下，帶有另一種思考，進而展示出一種很新異獨特嘅可能性。

到咗今日唔知聽日事嘅當下，slasher作為職業哩條本來唔係太多人會去揀嘅路，愈嚟愈多成功個案，就令人覺得揀得過，蜂擁而至。但「那通向滅亡的門是大的，那條路是寬的，從那裡進去的人也多」，咁我哋係咪就只能不斷從人多嘅路逃走，或者係要將愈嚟愈多人跟住我哋行嘅哩條路毀咗先啱呢？所以今期實際上想建議大家，唔好諗住去做slasher就解決到問題。能夠解決問題嘅，從來唔係一啲方法、定義，而係你自己本身點理解、會點樣用佢哋。你是你本身的問題／答案／傳奇。（又話唔slash又slash）

如果你居然睇到哩度先問「到底我又睇咗啲咩？」，你可以試下問返你自己睇咁耐其實係想睇啲咩？強行借用及翻譯耶穌同門徒講過，關於比喻嘅一句來作結：「係呀，我專登同佢哋講比喻㗎，等佢哋聽唔明，依家我就畫返條腸出嚟俾你哋睇，話你知我其實想講咩！」但其實，啲人睇公仔，通常都唔係想睇條腸㗎。