Catch 135 cover story 《 不／適用的／請刪／去圈出》

結束是另一個開始，又到選擇影響人生的時候。 

是升中四要選DSE的科，是升中六要選大學的科，也是應屆DSE在成績出了後作出最後決定的時候了。當然還有不分級別，到底要選擇參加哪一項課外活動、擔任哪個學會的職務等。 

選擇列在眼前，怎樣選、憑甚麼選、最好應該這樣選⋯⋯類似的問題，好像很容易，又好像很難。容易的是，自己喜歡又可以選擇的選項其實不多，困難的是，無法預算作出某個抉擇後，人生會如何被影響。是好？是壞？生涯規劃總叫我們要為將來好好打算，愈早有一個清晰的目標，便能愈早開始努力實踐。是「買定離手」？希望自己「贏在起跑線」嗎？ 

目標也不是沒有，但總會有人質疑，「這樣真的好嗎？」「是否見到別人選了好像不錯，令你也想跟隨？」「這不太有效益，選另一種不會更好嗎？」。本已經煩惱，再加上這些不同的聲音，就令自己更煩。想回一句「誰知道」，但疑問入了心，煩惱還在。 

小孩子才做選擇，大人全部都要。 

但看著那些大人其實也只是將「能拿在手上的部份」定義為「全部」後，就覺得所謂的取捨，終究無可避免。新高中DSE考試前的會考和高考，選科好像沒那麼複雜，有足夠成績的可以先考慮自己的興趣，成績暫時未夠好的就不用想太多，等待被安排。但我們現在除了成績和興趣，還要考慮校方時間表的安排。個別的科目，即使成績夠又有興趣，但可能會因為收生不足，或是老師課室編排問題，而失去我的最佳選擇；甚至可能為了修讀某一科，而被迫選修了與自己大學心儀的學系無關的科。 

這個制度看似提供了一個精細、按能力、為興趣、多元化的選擇，卻造成每次選擇都有背水一戰的壓力。好像有一個以自己的興趣和能力選擇後，再妥協於實際執行環境的「最佳」選擇，要人尋找出來。 

完善的規劃，將「未知、含糊時粗疏地前進、嘗試和摸索的經驗」取消了。選擇已不再是檢視當下面向未來的事，而是要選擇一個目標，並按各種成功的方程式去選擇最佳的那條路。所有的選擇，都只剩一個選項似的。 

這是甚麼年代的設定？這年代大部份的遊戲明明已在設定上盡量貼近開放世界，而且也會訂制自由度高的劇本，但是我們的選科，甚至生涯規劃，還是只可以這樣嗎？ 

---

Q1. 第一次聽到Slasher哩個term係咩場合？果時覺得係啲咩？ 
A1. 應該是某次跟同學還是同事聊天時，聽他們提起。覺得是一個新形態，可以讓人在新模式下的工作或生活空間中，尋覓自己更想投入的事。 

Q2. 在你認識的人當中，有無可以被歸為Slasher？如有，佢係一個點樣嘅人？你會點樣評價一個自稱為Slasher嘅人？ 
A2. 我認識的Slashers通常都是我的學生，以前會覺得他們想兼顧學習／工作，只是因為他們無法放下高薪厚職，認為自己應該鼓勵他們專注其中一項。但近年愈來愈多人選擇在學習外兼顧一檔事情（專業的工作／教會的事奉／生活的實踐），試圖為學生／檔主這兩個身份建立關係，創造生活空間。亦見到有牧者一邊牧會，一邊有教會外的嘗試，在場內場外去感受不同層面的牧養體會。他們不是為了幫補生計而多兼幾份工作，而是以創意和對流動性的想像，在多重身份下，實驗適合自己、可以平衡生活中必要之惡及個人理想實踐的空間。 

Q3. 你會唔會選擇做一個 Slasher，定係諗諗下你都覺得自己係？ 
A3.我不是也不會是Slasher，一來我現在單一的工作就有很大的發揮空間，不需要靠Slash去創造新的空間。二來到了這個年紀，已很清楚自己核心想做的事就是老師。就算兼任了不同崗位、有不同的身分，我亦不會放下老師這個身分去做，甚至會嘗試在這些不同的崗位／身分中注入我認為的「老師」成份。 

Q1. 第一次聽到Slasher哩個term係咩場合？果時覺得係啲咩？ 
1. 好多年前係喺雜誌訪問中第一次聽到Slasher，係介紹啲多產職業的年輕人用的字眼，呢個字令我覺得係：「同一時間打幾份工、多才多藝的自由業者 」 

Q2. 在你認識的人當中，有無可以被歸為Slasher？如有，佢係一個點樣嘅人？你會點樣評價一個自稱為Slasher嘅人？
A2. 無識人咁定義自己。但其實諗真，個個人都可以係Slasher，做住一份工，又做女兒／媽媽照顧家人，又在教會撈個專項事奉，外加個興趣（例如：參加跑山比賽、時常參加訓練…..）呢啲算唔算都係Slasher？朋友中已有三幾個。Slasher要好有活力無時停，多才多藝，非常勤力捱得。  

Q3. 你會唔會選擇做一個 Slasher，定係諗諗下你都覺得自己係？ 
A3. 我絕對唔係，我享受專注一項專長，其餘時間和貓放空悠悠閒。 

Q1. 第一次聽到Slasher哩個term係咩場合？果時覺得係啲咩？ 
A1. 3-4年前的報紙專欄介紹職場的新形態，當然覺得是年輕一輩的工作模型。 

Q2. 在你認識的人當中，有無可以被歸為Slasher？如有，佢係一個點樣嘅人？你會點樣評價一個自稱為Slasher嘅人？ 
A2. 有。她是對自己工作及生活有要求的人，認為可以在不同崗位上滿足自己，也可以維持自己生計。 

Q3. 你會唔會選擇做一個 Slasher，定係諗諗下你都覺得自己係？ 
A3. 現在當然不是。如果他日提早在工作上退下來，我會考慮Slash.  

Q1. 第一次聽到Slasher哩個term係咩場合？果時覺得係啲咩？ 
A1. 其實都唔係好清楚，到呢一刻都覺得自己唔係真係好明呢個詞 （畢竟世界每日都多咗好多新嘅詞語，好難活用每一個）。我諗我對Slasher嘅印象大概係覺得好似打雜，咩都做下咁🚬。 

Q2. 在你認識的人當中，有無可以被歸為Slasher？如有，佢係一個點樣嘅人？你會點樣評價一個自稱為Slasher嘅人？
A2. 我覺得好多人其實都係Slasher。我會覺得呢個字都幾準確咁表達到我哋每個人嘅多重身份。我覺得我嘅牧者係個最典型嘅Slasher，佢又要講道(教師)，又要諗program (節目統籌)，調配事奉人手 (人事部)，諗下點面對教友嘅投訴 (公關)， 得閒又要換下廁紙咁。有時我都會諗究竟一個人係咪自願咁成為一個Slasher，定係我哋都比呢個世界逼成一個Slasher。  

Q3. 你會唔會選擇做一個 Slasher，定係諗諗下你都覺得自己係？ 
A3. 有得揀，我應該都會做Slasher。我覺得Slasher代表緊一種突破，不拘泥於事情嘅一種觀念。我哋唔使再被某d框框同詞語限制，可以好自在咁做唔同嘢，活出真正自由嘅生命。而呢一刻嘅我都覺得自己係Slasher㗎。得閒係IG開下po，寫下文，有時又喺教會帶下組，幫下小朋友補習⋯⋯都算係Slasher？ 

---

那三年高中，我踏上了DSE往大學的那條單程路⋯⋯ 

//「我最記得中二三果陣的比賽⋯⋯」 

之所以記得，不是因為中二三特別精彩，而是那次已經是中學生涯最後一個深刻的實體經驗… 中三剛淺嘗過比賽的激情，雄心壯志地預備把整個高中的時間都投放進這一範疇，突然巨浪就來，一切都被剎停，時間都彷佛停往了。亦有同學難得被提拔為學生領袖，卻無用武之地。另有同學因為經歷不同的分離，理性地對人際關係發展表示保留。 

「對於從前事事都看似能作決定的我，高中生涯令我學懂了的是『放手』⋯⋯」// 

以上的悲鳴，來自今年DSE門徒訓練營嘅同學。究竟世界要多殘酷，才讓一個18歲未出頭的少年人學懂一個如此深奧的課題？被高中疫情「打殘」的共鳴在營會某夜的房間中始起彼落⋯⋯ 

中學生涯，好似一切都係為咗考好DSE入到大學，但同時入到大學，又好似唔止需要考得好嘅DSE成績，仲要有好多課外活動、領袖經驗咁。唔淨係要專心讀書，仲要有其他可以攞出嚟講但又唔阻住自己讀書嘅一技之長，哩件事，到底有幾難？明明只是個學生，但除咗讀好書之外，仲需要係一個傑出嘅運動員／音樂家／事奉者／領袖⋯⋯新時代想做一個成功人士，就應該做一個Slasher，多重身份，多重專業。聽落好似自由切換，隨心安排，但被認可做一個Slasher又點？整個社會認可嘅只係精英，或者全能型嘅精英。盡力兼顧好多嘢，做到自己鍾意做嘅嘢係唔夠㗎！唔夠好嘅學業成績，父母同師長都係會擔心。 

咁普通地做返個學生，高中三年專心努力讀書，目標係DSE 5星星考上大學，然後得到高薪厚職，成功買樓養掂自己、同時幫到身邊有需要嘅人，咁就得？自己知自己無咁有料做到，仲加埋哩幾年疫情話嚟就嚟，好似再畀力盡做，亦唔見得對抗到大環境、可以按部就班去行哩條一定啱咗咁多年嘅路，咁仲可以點？But，就係哩個but，如果真係可以喺多重身分下，換到啲時間空間，等自己可以認識多啲自己，認識多啲神喺自己身上嘅美意，知道我之所以為我嘅召命係咩，咁就算賺返。雖然到最後，可能都只係行返哩一條要讀好書嘅路，被人話做咩行咗咁多冤枉路，但都唔怕。 

//「原來接待，係可以接待自己！我從來無諗過，我覺得我好需要。」 

對一個中學生來說，DSE的壓迫是肯定的，但比悲慘更悲慘的事是，支離破碎的高中生涯，連「一同受壓迫的人一同抵抗、奮鬥」的連結感覺都切斷了，那份孤獨，任誰都有共鳴吧。// 

以上，也是來自今年DSE門徒訓練營。 

但其實都唔係唔怕，雖然話確信神喺自己身上有美意之外，如果有多啲鼓勵，無咁多否定就好啦。特別係一直試新嘢嘅時候，唔一定咁快見到個結果，仲會有好多失敗，唔知自己咁做啱唔啱。但無論係自己接納自己，定係同一齊都係度試緊嘅人一齊努力互相接納、互相肯定哩一下嘅自己唔係浪費緊時間，而係為咗未來嘅自己，拓展緊可能性。哩啲同自己、同其他人嘅連結，應該可以幫到大家無咁易被大環境輾碎。