《Catch 136》睇字真係咁辛苦？

點解今期《Catch》無咗Cover story，但係講流行文化嘅Catch the Heat內容多咗一倍？

因為今期就係想試下無主題，淨係講下動漫電影，睇下淨係講哩啲，會唔會夠嘢講。

又真係夠喎。

無預謀又無計劃咁，好隨機地向《Catch》嘅廣大讀者／作者群體發問：「最近有無睇咩動漫電影呢？有無咩感想反思想寫下呢？」由於有截稿期限的限制，收回來的數量大概就係咁多，但內容一啲都唔就係咁。

而我哋其實都係度問返自己：「點解我哋係問人睇咩動漫電影，而唔係邊章邊節聖經有感想反思想寫下呢？」不過咁問，其實又唔代表我哋想搶隔離《吾靈修》啲稿，而係想梳理返，點解睇《聖經》好似係咁難咁呢？明明聖經裏面除咗悶少少講好多道理規矩要求嘅部份外，亦都有好多生動驚險人性嘅劇情，要推廣都唔會好難啫。

比較返，可能原因係：字？

字，《聖經》全部都係字。即係就算唔似動畫或者電影咁識郁，漫畫起碼都有啲圖，唔係全部都係字，好似易入口好多。字係咪真係睇聖經嘅最大障礙呢？但見睇完今期《Catch》嘅你，字可能都唔係障礙，咁，又可能係咩呢？

可唔可以歸究中文和合本《聖經》用字過時？（但其實有新譯本、和修本、廣東話版等好多譯本）又或者覺得內容始終都係好多好多年前，唔係太夾到依家嘅生活？（但其實古裝劇都好多人會睇）會唔會係一直以來，《聖經》都被標示為神聖嘅經典，所以一定要好認真咁睇，仲要睇得啱同有得著先得？睇聖經無睇到大家睇到嘅嘢，就會變異端，唔睇好過睇？睇完要有異象有感人嘅領受去分享，唔係就同無睇無分別？

或者我哋應該慢慢搞返清，認真面對信仰，其實都包含唔好將一啲唔知邊度嚟嘅規則視為信仰嘅基本，而扼殺咗我哋對信仰，特別係對《聖經》嘅好奇心。無論係認真地睇動漫電影哩啲世俗作品然後尋找反思信仰，定係當睇小說咁輕鬆投入《聖經》享受下果啲突如其來嘅唔知點解嘅敍事，其實都係幫助大家更加認識神同整理自己信緊咩嘅信仰活動，唔好畀佢停呀！

又叫人反思信仰，即係又想人投搞啦？係呀，我哋繼續等緊大家嘅投稿！唔淨係字，圖都好歡迎㗎！