CATCH 137《理想主義團長的異世界團契重建》

估唔到宜家啲輕小說同動漫仲流行「異世界」和「穿越」呢類嘅題材，近幾年異世界及穿越題材嘅作品可以話多不勝數，故事離不開主角經常突然意外死亡，然後轉生到異世界冒險展開第二人生。雖然「異世界」和「穿越」變成了氾濫嘅題材，但係呢類作品都真係充滿娛樂性，加上透過睇呢類作品，讓人沉浸係異世界的當中，可以探討一個未知嘅世界，同時暫時忘卻真實世界嘅憂慮，確實容易使人愛不釋手嘅。

講開又講，我更估不到我竟然會有幸成為異世界穿越大軍嘅一份子。還好只係穿越，並冇轉生成為嬰孩需要重新長大，更冇轉生成史萊姆呢類非人種或怪物類，但點解有提供最重要嘅外掛(TдT)。我鐘意「異世界」和「穿越」題材嘅作品，唔等於本人鐘意成為當中的一份子，更重要係點解人哋穿越大多數會做救世主同冒險者，但係我穿越就係做學生團契嘅團長呢？仲要搞返好哩個學校嘅團契？

其實，我對於自己能夠成為團契團長呢件事，一直存有疑問。我相信其他團職同我一樣，都有相同嘅疑問。究竟點解會揀我做呢個咁重要嘅職位？係因為我信主嘅日子比較耐？係因為我出席團契活動次數最多？定係因為我唔懂得拒絕老師嘅邀請？總括而言，無論係穿越前後，我都係冇意識點解要咁選擇下，就已經應承做團職。

做團長遇到嘅各種問題，離唔開要負責策劃團契嘅各種活動，包括週會、查經班、校園佈道、祈禱會等，真係需要花好多時間同精力去籌備。我雖然係團長，但我本身只係一名中學生，同其他同學一樣，每日只有24小時，扣咗返學同夜晚休息嘅時間，每一日剩低大約8個鐘左右，仲未計要去嘅課外活動、溫測驗考試， 同完成數之不盡嘅功課要用嘅時間。要處理團契嘅職務，認真唔容易。搞個活動睇起嚟好簡單，但背後其實仲要花大量嘅時間心力，過程中又要承擔住好多責任同壓力。

再講，我都係第一次做團長，之前冇任何嘅經驗，亦冇專業嘅訓練。老師同其他團友都係知㗎，但係點解我一做咗團長之後，佢哋對我嘅期望瞬間提升幾個Level？會認為我可以即刻做到晒所有團長要做嘅嘢？ 搞到我成為團契團長嘅過程，好似遊戲中嘅轉職儀式咁，加個銜頭就係團契團長。甚至乎仲可以開埋外掛，瞬間點滿團長職業嘅技能樹，兩秒獲得所有做團長嘅必備技能，全本聖經嘅內容，都可以瞬間掌握。

提到聖經知識我又開始頭痛啦， 平時聚會，特別係查經果陣，有啲團友會問啲比較難同刁鑽嘅問題。本身問問題係件好事嚟嘅，既可以促進團友之間嘅互動，又可以引發大家去思考。若果團友係小組討論中得到共識果陣都還好，但冇答案時，團友就會用充滿期望嘅眼光定睛喺我身上，期望我可以畀佢哋一個滿意嘅答覆。如果我識得點答，「幫得就幫」都冇咩問題，但問題係呢啲題目我大部分都唔知可以點答。一個團長成日俾人問問題唔係問題，但最慘係我都唔知點答好，搞到每次人人都望住我，但我就答唔到啲咩，好似咩都唔知咁。

我非常開心能夠同大家一齊討論信仰上嘅問題，但當大家遇到信仰上嘅疑問時，想從我口中得到一個標準答案時，請記得其實我只係同大家一樣，只係一名中學生。我遇到問題，同大家一樣都只係可以做一啲資料搜集，上網或睇一啲工具書搵答案，得到嘅答案應該同大家自己搵冇咩分別。如果問我只係因為覺得自己搵麻煩嘅話，應該直接搵宗教科老師，教會的傳道人或AI，相信佢哋一定會有比我更可靠嘅解答。

團長作為團隊嘅領袖，係需要獨立思考問題同作出最後嘅決策，有時候仲要獨自承擔壓力同責任，有孤單嘅感覺。另外我仲需要關注每一個團友嘅成長同發展，擔心佢哋會遇到嘅困難同問題，不時要協調團友之間嘅關係，幫助團友處理同解答問題，真係一日48個鐘都唔夠用。

點先可以成為一名合格嘅團契團長？又或者成為一名稱職嘅團職同領袖？其實有咩重要嘅條件呢？

撒母耳記有記載耶和華揀選大衞取代掃羅成為以色列嘅王時，耶和華咁同撒母耳先知講，「不要看他的外貌和他身材高大，我不揀選他。因為耶和華不像人看人，人是看外貌，耶和華是看內心。」（撒母耳記上16:7）。呢段經文除左提醒我，神係看重人嘅心靈同品格，所以我哋唔可以只係看重外表，而係要看重內心嘅培育同成長。比起聰明智慧，最重要係當事人有冇具備願意成為領袖嘅心態。經文亦都提醒我，上帝揀選人係建基於佢嘅計劃同旨意，我哋所信靠嘅上帝係全知全能嘅神，上帝嘅心思意念唔係我哋能夠預料，我哋作為基督徒只需要信靠佢，順服佢嘅帶領就可以。

確實我作為一名團長，可能搞活動、帶週會嘅能力並唔完美，聖經方面嘅知識亦唔充足，更未能夠處理團友嘅所有問題，但是我想去事奉嘅心並不比其他人差。為着整個團契嘅緣故，我願意為團友們付出時間同心力，主動關心同幫助佢哋，並且係有需要嘅時候支持佢哋，讓每一位團友都感受到溫暖同歸屬感，並且係信仰上互相學習、一同成長。呢啲事情都係我甘心樂意為上帝所做嘅。

難得穿越到異世界，難得上帝又再次揀選我，等我可以繼續做團長。呢一次我要為自己定立一個新嘅目標，挑戰自己，成為一個上帝所喜悅嘅僕人領袖。