CATCH 138 《有深度地玩：當玩遊戲成為服待》

Q1）Hi蘇sir，上次喺ISO度你帶過我哋玩你設計嘅「密室逃脫」遊戲，有同學玩完之後表示自己都想做設計遊戲嘅人，所以想趁機問你一啲關於遊戲設計嘅嘢。請問你平日設計遊戲有啲咩秘訣／要點？ 

A1）我覺得最重要係設計出嚟嘅遊戲係令自己都會鍾意去玩，而有一啲元素係可以令普通嘅遊戲都變得更好玩，例如引入背景故事、添加電子元素、遊戲過程動靜兼備等。 

Q2）你覺得點樣先為止好玩既遊戲？ 

A2）我覺得遊戲要好玩，最重要係要令玩家覺得「自由」，令玩家唔只可以去跟從一套玩法，亦可以有自己嘅玩法，甚至可以選擇自己參與咩角色；當然遊戲必定要有規則，所以好玩嘅遊戲須要從「規則」同「自由」中取得平衡。 

Q3）如果喺校園團契裡面，應該要點樣設計遊戲去fit 初中／高中生玩？ 

A3）喺學校學生平時一日已經聽好耐書，所以團契內嘅遊戲不宜太複雜，最好係「易學難精」。例如有一個輪流倒水入水杯嘅遊戲，每人每次可自行決定倒幾多水，最後邊個令杯水瀉就算輸，規則簡單，但背後嘅技巧唔容易去精通。 

Q4）同學做咗團職後成日都煩惱：初中團友仔對玩遊戲好有興趣，好投入，但一坐低傾信仰就即刻好似冇興趣、覺得好悶，想知點樣先可以喺遊戲當中帶出信仰？應該要點樣設計遊戲，以至於能有信仰意義得嚟又唔悶，但又唔會好夾硬呢？ 

A4）藉遊戲帶出信仰主要可以有兩個方向： 

第一係聚焦遊戲嘅「過程」，去抽取某啲元素去比喻信仰。例如之前提及嘅倒水遊戲，過程中玩家倒水時要專心，就可以藉此帶出靈性方面嘅專注； 

第二係從遊戲嘅「結果」去引入信仰，例如遊戲過程大家會搵到一啲經文，最後帶領者就可以藉經文單刀直入去帶出聖經嘅內容。 

Q5）你覺得可以點樣平衡團契安排中，「遊戲好玩」定「信仰有深度」呢？ 

A5） 其實要做到「遊戲好玩」或者「信仰有深度」其中一樣已經非常唔容易，而往往團契時間係活動設計嘅最大限制，因為越高質嘅活動，需要嘅時間就必然越多；如果團契冇咁多時間，我覺得可以簡單啲，用好玩嘅小遊戲作引入，再以信仰或實踐信仰作為主菜。畢竟團契真正能吸引人嘅，最終應該都係基督教信仰本身。 

Q6）對你嚟講，帶遊戲呢個崗位你會叫做「服侍」嗎？點解你熱愛呢樣服侍呢～？有冇咩dream😝? 

A6）現今社會嘅娛樂都係趨向個人化，意識上好似係個世界要 serve （服務）我哋去令我哋自己開心；其實現今嘅青年人係比以前更需要有高質素嘅群體娛樂，令肢體間有更多機會去連結，亦能促進唔同人可以去互相欣賞（彼此相愛），而提供呢個平台嘅人，正係「帶遊戲」嗰位。 
我覺得帶遊戲係非常神聖嘅工作，絕對係一種「服侍」；我熱愛帶遊戲，係因為透過呢種服侍，可以見到年青人嘅笑容，亦能幫助佢哋能夠被看見（平日在學校可能佢哋存在感唔太高），仲可以帶領佢哋去思考信仰，真係非常有意義。 
未來我希望可以引入更多唔同嘅科技去帶團契遊戲，例如係 VR，目前技術上仍有好大限制，但我相信未來係能夠實現。