Catch 144 Catch 第一屆《團契最不受歡迎的人物》比賽
各位同學們，大家好 ～ 又來到新學年新一屆團契開始的季節了！
今期Catch要舉辦一個特別的團契活動，誠邀你和你的朋友們一同參與！
歡迎大家來到～ Catch第一屆《團契最不受歡迎的人物》比賽！
這是一個為了尋找團契中最討人厭，最乞人憎的人物而誕生的活動！
是不是一聽到這個活動名稱，腦海便不自覺浮現出幾個不同的身影和人名呢？ 可能有一些善良的同學會疑惑：「這類選舉會唔會好MEAN？ 真的適合在團契時舉辦？」 但等等，先不要急著離開！讓我們一起來揭開這個特別活動的神秘面紗，看看有什麼有趣的事情正等著我們！
在學校或團契圈中，我們難免會遇過一些不想與他們交流或接觸的人，或許是因為他們外表、言行、興趣或其他的原因，會經常使人有意無意地想忽視他們，被視為不受歡迎的存在！
可能是那個在班上經常搶答老師問題的「模範生」同學？可能是那個會向老師打同學小報告的「二五仔」同學？ 可能是那個經常欺善怕惡的「偽不良」同學 ？ 還是那個無主見無決斷力的「媽寶」同學？
因此，今天我們要進行一個有趣的投票活動，一人一票找出團契群體中最不受歡迎的人！接下來我們一起看看12位候選人的簡介，究竟最後哪一位候選人可以脫穎而出，成為第一屆團契最不受歡迎的人物比賽的優勝者呢？
*Catch 為了給予候選人公平及平等的對待，所有候選人的真名將會匿名化，直到投票部分結束。
**不得提供任何零食、「廢水」或透過威迫利誘，以影響他人的投票決定！
讓我哋以熱烈嘅掌聲同歡呼聲，歡迎咁多位候選人出場啦！
1號候選人
經常懷疑人生，缺乏自信嘅A先生！ 危機意識過剩，完美咁演繹出「大難臨頭各自飛」嘅精髓。當遇到危難時，A先生為咗實踐「愛自己」嘅教導，不但會出盡方法為求甩身，仲會講大話出賣自己嘅伴侶！呢一種人竟然能夠喺社會能夠畀其他人接納到？
2號候選人
B先生出名狡猾同善於計算。詭詐嘅佢善於利用計謀去欺騙身邊嘅人，連家人朋友都有殺錯冇放過！ 絕對係令群體引起衝突N不信任的源頭。此外，作為團契領袖之一嘅B先生待人方面偏心得好明顯，引發其他人的嫉妒，亦都令到部分同學之間產生隔閡，影響團契嘅和睦。
3號候選人
缺乏同理心嘅C先生未能夠體諒身邊嘅人嘅感受，亦都無法設身處地為弟兄姊妹謀福利，佢嘅表現過於專注於自己，經常忽略其他人嘅情緒。再加上C先生自小就有一種優越感，鍾意向身邊嘅人炫耀自己，經常引起了其他人嘅嫉妒和怨恨，可以話係今屆選舉嘅大熱門人選！
4 號候選人
性格急躁，EQ低嘅D先生，特別難同其他人建立和諧、穩定嘅關係。加上D先生做嘢經常猶豫不決同埋會自我懷疑，加上習慣搵藉口逃避責任嘅特質！令作為領袖嘅D先生需要更多嘅努力，先能夠贏得到其他團友嘅認同。
5號候選人
E小姐聰明機智，但因為爭競心及嫉妒心特別強嘅緣故，使佢無辦法接受人哋比自己強，見到同輩嘅朋友地位高於自己時，會感到好難受，並會透過毀謗他人嘅方式獲取利益，擁有無法容忍其他人超越自己嘅複雜情感。
6號候選人
F先生為人好聽啲就叫立場堅定，難聽啲就固執！本人向來出名，無論你點解釋都好，佢仍然會堅持己見，認為自己講嘅嘢最合理，唔願意作出改變。 再加上F先生為人自私同缺乏同情心，鍾意逃避責任，係今次選舉嘅黑馬～
7號候選人
G先生本身package唔差。為人謙卑，熱心事奉，再加上領導力強，係做領袖嘅好材料。但點解佢會入選選舉的候選名單？因為G先生衰咸濕，仲要唔理有冇另一半嘅異性，只要有好感G先生都會借啲椅去接觸！aka 狗公
8號候選人
H小姐外表美麗動人，可以話係人見人愛，車見車載！點解會被視為團契最不受歡迎的人物嘅候選？ 正所謂美麗有罪，因為H小姐生得靚，已經夠資格成為候選人～ 再加上H小姐畀人嘅感覺係缺乏獨立判斷同決策嘅能力，傳統嘅「迪士尼公主」！都係比較適合留喺童話故事安全啲。
9號候選人
I先生渴望地位同權力，但能力同責任感方面咩都爭少少。「講就天下無敵，做就有心無力」最啱就系形容I先生呢一類人～ 處事起來游移不定，忽冷忽熱，最過份係講到實牙實齒咁許下嘅諾言，但最終都會持守唔到告吹。
10號候選人
判斷力領導能力非常高嘅J先生！加上他嘅主動性和服從性，本應該係參加《團契最受歡迎的領袖人物選舉》！可惜J先生嘅特點是性格固執，同鍾意指指點點其他人，好多時候畀人嘅感覺系冷淡同嚴厲！令J先生比較難同其他團友和諧相處N合作，甚至係合作過程中經常引起部分人嘅反對同仇恨。
11號候選人
被譽為「好好先生」K先生！性格溫和，對任何人都表現得非常寬容和仁慈！但K先生呢種左右逢源，模稜兩可，過度寬容嘅性格，面對衝突發生時，容易畀人視為牆頭草，無法適當咁處理衝突同糾正問題。 再加上K先生處理事情嘅方式偏向以關係行先，呢一種行為模式普遍被社會視為偏私缺乏公正性。
12號候選人
最後一名候選人L小姐明顯係資本主義下嘅受害者！ 每次喺團契見到佢嘅時候，總係坐唔停咁樣處理大小事務，好似有好動症，完全停唔到落嚟！L小姐社畜一般嘅表現不但只令佢缺乏與其他團友有深度嘅交流機會，更令其他人懷疑佢係一名「心機女」，埋頭苦幹地做嘢係為咗博出位～最後L小姐成為團契嘅邊緣人 。
好！12位Catch第一屆團契最不受歡迎的人物比賽嘅候選人已經全部登場了！相信總有一位啱你心水～ 接下來到投票嘅嘅環節！請選出你心目中團契最不受歡迎嘅人物吧！
比賽結果將於稍後公佈 ～ 敬請期待 ！