Catch 146 DSE2024門徒訓練計劃《天空之城》 自主研習社 ： 關愛受造物 （貓狗篇） 

 

序  

今次嘅自主研習社主題係關愛受造物。為咗了解受造物， 我哋喺研習過程睇咗《聖經生態學》、《馴化X慾望》、《起初 關愛受造世界》呢幾本書。  

我哋分咗三部分去研究，分別係人同受造物嘅定位、人類嘅管理形式 ( 動物喺現時嘅遭遇）以及點樣去實踐關愛受造物。  

關注重點係貓狗上，為咗了解更多關於動物權益， 我哋走訪過保護遺棄動物協會(簡稱SAA)、「Chill • 愛貓 （香港愛貓日子 – Love Cats Everyday）」、同埋探訪芷媛傳道同佢嘅導盲犬。而其中較多嘅部分會放係貓貓狗狗喺現時人類管理下嘅生活模式。  

研究喺過程中令我好驚訝嘅係，我認為喺而家呢個咁先進嘅世界，貓狗嘅生活應該過得越嚟越好！然而喺研習之後，先發現其實佢哋嘅生活依然係同過去一樣，只不過係能夠以一個更加先進同科學嘅方式死亡。 

寵物店賣唔出嘅倉鼠會去邊？愛護動物協會評定人道毀滅嘅標準係咩？政府一年人道毀滅不同動物嘅數字？問題嘅答案係乜嘢？我相信每一個珍惜動物生命嘅人都唔會想知道答案?  

*漁護署公佈2022年被人道處理的貓狗數目為830隻 

**愛護動物協會在為了減輕動物的痛苦，或當動物極具攻擊性並對其他人類及動物構成危險時，會讓動物安樂死。 

喺走訪中印象比較深刻嘅係，一入到狗場，有啲狗仔見到我哋就擺曬尾，好開心咁望住我哋，即使隔住個籠都會好努力靠近我地，但係狗籠上方嘅資訊牌，就顯示咗隻狗仔曾經遭受唔好嘅對待，或者喺細個嘅時候畀人裝落狗袋等死。更加莫論某部份好安靜嘅狗。佢哋喺遭受唔好嘅經歷之後仍然對人類有信心，唔知點解見到咁善良同單純嘅狗就有一種莫名嘅愧疚。  

調返轉諗，我哋畀人傷害過之後，係咪做到仍然願意相信其他人呢？但係佢哋作為動物卻做到呢一份單純同善良。 我諗，作為人類，我哋都有啲責任要照顧好啲動物。  

由聖經嘅角度去睇，創世記裏面記錄人類要管理萬物，同時也有記錄低其他受造物被上帝創造嘅過程。而當中「神看自己所造的是好的」（創世記1章4、10、 12、18、21、25、31節）喺呢句不停重複的經文入面，我哋可以知道所有受造物喺上帝眼中都一樣係有價值，並唔係俾我哋肆意揮霍嘅工具。  

現今社會好多人認為，萬物係應該圍繞住人類去服務，而人的確用科學技術去衝破大自然嘅界限，去滿足人無限嘅慾望。 

係Richard Bauckham的《聖經生態學：重探人與萬物的關係》入面，我發現一個好有趣嘅見解。上帝設立大自然嘅界限，其實有令人類借呢啲界限去隱惡揚善嘅原意，並唔係希望人完全放縱自己嘅慾望。人類喺管理萬物同時，亦要適當地約束自己嘅慾望、保障其他生命嘅生存權利。  

若將聖經觀套用喺動物生命上面，我哋作為基督徒，好應該關愛多啲身邊嘅生命。知道好多人會覺得自己同動物嘅權益距離好遙遠，覺得人類同動物始終都係唔同。但係人類與其他受造物不同，就係人有同理心，所以我哋更加應該將呢份同理心用喺動物身上。無論係作為基督徒定係普通人，少少嘅行動已經可以為貓貓狗狗帶嚟好大嘅改變。  

今次自主研習社主題係講如何看待不同生命同如何尊重生命，特別係對貓狗。  

喺我上網搵相關影片時無數貓狗被虐待，甚至被當作食物嘅影片出現，令我忿忿不平，再配上「窮人的薔薇」呢首歌，當中的歌詞「平凡人們要怎麼拯救」令我感到無助，但其實「不死尚有無限宇宙」 ，我知道唔應該因為可以做嘅嘢有限而唔去做，幫助可能好少，但都應該去做，多關注貓狗議題，佢哋本身有被創造嘅價值，唔係只為人類而生。  

由呢個角度出發，其實人同貓狗都一樣，同樣都係作為受造物，應該係同人類互惠共生，而非為滿足人類一己私慾的寵物。天國都要靠我哋嘅行動一步步拉近，而關愛受造物就係其中一種方式，我哋作為基督徒係有責任管理同照顧其他受造物。