Catch 127 – Fellow up – Q&A

本文為模擬社交媒體記錄,內容來自一次由兩位讀ERS*的同學,一位沒有讀ERS的基督徒同學,和三個是基督徒的大人在疫症下的一次Zoom。
*ERS即Ethics and Religious Studies 倫理與宗教,為DSE的選修科目 

覺得近期香港有咩唔同?

ANSWER: 6月條街好似小咗好多人,特別係上水。但依家好多水貨藥房開返,又多返人

無哂水貨藥房,條街空返出嚟,對生活其實有無影響呢?

Martin:@Catch無水貨藥房對我嚟講完全無問題,唔去水貨藥房買嘢,其實有其他選擇。

Clara: @Martin水貨藥房賣啲嘢其實平過其他舖好多,不過我唔會幫襯,費時助長佢哋,所以佢哋無哂無所謂。但係點解佢哋啲嘢會平咁呢?

Catch: @Clara 應該係大量入貨會平啲

Martin: @Clara佢哋啲存貨可能係舊貨,就到期果啲,所以特別平,又或者唔同產地又會平啲。有見過盒金X朱古力,平成一半。其實裏面係搵啲椰菜仔灑啲花生碎再包金色紙。

Catch: @Clara @Martin但無咗水貨藥房,成條街靜英英,會唔會覺得熱鬧啲好?

Clara: @Catch 邊有人用熱鬧去形容水貨街,本身係住宅區,靜同無嘢玩係好應該。

Martin: @Catch 依家除咗食嘢都唔會出街啦。


停課停到4月中有咩影響呢?

ANSWER 1: 中一至中四會「他條」啲~中五中六就慘啲囉。

ANSWER 2: 我哋中五每日交咗功課就得,自學哩啲野就算啦。ZOOM同正式上堂都唔同,返去點都要講多次啦。

ANSWER 3: 2月嗰陣無咩功課,一話停到4月中就突然好多功課,每日一起身就做功課,唔知之後點算。

其實停課係咪真係有效呢?

Clara: 停課停咁耐,我覺得係人為囉。本身唔關我事,如果個政府可以阻止疫症爆發,佢可以做啲嘢,但最後無,變咗無限期停課。政府咩都唔做,真係好MAD。

Martin: @Clara 佢話佢有做囉。但要早啲做,依家先做同無做無分別。

Catch: @Martin@Clara@Ken 咁點睇復課?

Clara: @Catch 覺得好矛盾,又話4月復課,咁應該到時疫情控制到啦。但又要戴口罩又要探熱做好多嘢,咁到底係控制咗定控制唔到?

Martin: @Catch一復課老師會繼續趕書,唔知教唔教得切。

Clara: @Martin中五暑假返多啲咪得囉,其實睇怕全部學生暑假一齊補課。

Martin: @Clara 預咗啦,其實本身中四五都應該要補課。

Ken: @Clara暫時都好難講,都係要追返啲進度。

Clara: @Ken 全部人一齊補課啦,無理由要一齊留級,咁哩年之後啲人都好慘,無啦啦讀多年。不過算啦,教育局佢咩都唔諗,唔會話我哋無教到就唔考。

Catch: @Clara搞咗成個月,考評局終於決定如期考DSE,你就嚟要考,掂唔掂呀?

Clara: @Catch對於中六學生嚟講,其實啲書點都算係教哂。最受影響都喺心情,唔係教學上的問題。哩年又有社會運動專注唔到讀書,又面對疫情普通出下街都擔心中招,MOCK又未考哂,又無得搞LAST DAY,無咗啲回憶。 我依家好擔心去DSE會出事。 

Ken: @Clara 我哋學校一完考試就放假放到依家,都無派過卷。中六未考哂MOCK,啲卷已經另外俾咗同學,等佢哋做完之後自己對答案,但都係無LAST DAY。

Catch: @Clara 驚出咩事?

Clara:,驚中肺炎。好似應該揀返一轉大陸,報話自己考唔到,等考評局直接俾個2或3自己,反正校內成績都OK,好過就咁直接去考,睇怕得個1或者U。

Martin: @Clara依家啲評估方法好模糊,好似好唔公平咁。

Clara: @Martin聽講有啲學校做唔哂IES,就話不如取消IES。我哋做咗三年依家先話要取消?啲努力咪白費咗!


點解會揀ERS?

ANSWER: 因為我理科就無可能,有啲想揀嘅科就唔鍾意個老師,最後就揀咗ERS,覺得吹水好似會好啲,但係中三一開始讀就覺得難。

難係邊度丫?

Clara: @Catch做啲問題全部都估唔到背後有咩意思,解完好似無解咁。我個ERS老師,教攞分位有啲含糊,但平時上講Side track 啲嘢OK,不過幫唔到考試。好似最近要寫咩叫與主契合,完全唔明。

Catch: @Clara咁你點解決哩個與主契合嘅問題? @Martin @Ken你知唔知咩叫與主契合?

Martin: @Catch 未教到。

Clara: @Catch有朋友係基督徒由細返教會,問佢就會好啲。與主契合,即係自己要做到好似耶穌咁囉。依家好深刻,因為真係聽唔明,花咗好多時間問同解。

Ken: @Catch 與主契合,可以係與神同行,同神一齊,將耶穌放喺個心入面,信仰變成一種生活習慣,而唔係星期日返一次教會就算。

Catch: @Clara 咁樣死記會唔會好慘

Clara: @ Catch其實為咗攞分要死記哩啲答案喺無問題,但唔知點解要強調耶穌哩一個人。

Catch: @Clara 咁你讀咗幾年ERS,覺得基督教喺咩呢?

Clara: @Catch我覺得基督教似神話,係一啲虛構又好聽的故事。讀咗3年ERS,係喺度聽故仔。

Catch: @Clara咁讀足三年,為咗分去聽故仔,會唔會覺得好浪費時間?

Clara: @Catch都唔係淨係為咗攞分,咁其實耶穌啲教導都幾啱,但果啲教導唔一定喺死而復活的耶穌身上,先套用到。

Catch: @Clara同其他宗教比較下好似喺咁,但其實成為好人唔係基督教嘅重點。

Clara: @Catch崇拜一個人就會想跟佢做,所以個宗教以耶穌做目標係無問題,但唔信哩個宗教嘅人,

其實都無哩個諗法,會覺得可能搵第二個人代入都得。

Ken: @Clara我哋信聖經啲內容都係神默示嘅,耶穌的言行都係神嘅教導,耶穌唔止係一個聖人,佢仲要係一個救主。其他宗教唔會講神創造人同世界,亦唔會話係人離棄神所以先要拯救,唔會講哩類嘢。

Clara: @Ken 無親眼見過點解有人講就要信?曾經有個同學同個基督徒老師講,話另一個同學做咗啲衰嘢,個老師答佢話,佢無親眼見到,係唔會信個同學有做錯事。我其實好想問個老師,咁你又信基督教。不過人哋信我覺得無問題,係我自己唔信姐。

Catch: @Clara @Martin 讀ERS會唔會令人讀讀下唔信基督教呢?

Clara: @Catch 讀完反而唔信啲人,其實佢哋係咪真係信?信仰唔應該咁易放棄或者改變。


一單最唔明點解會係咁的宗教相關事件

ANSWER 1: 基督教學校個校長雖然個口講基督教,但其實唔係信基督教,佢成手都係佛珠,校長室內仲要有佛像。

嘩,好爆喎,一定要手動轉~

Martin: 校長單嘢人人都知,維基有寫。

Clara: @Martin我都唔鍾意我個校長,佢之前炒咗個通識老師。

Catch: @Clara @Martin學校宗教氣氛濃唔濃?會唔會逼人一定要去啲宗教活動?

Martin: @Catch通常老師都只係會問下參唔參加,但係唔會逼。

Clara: @Catch其實我哋學校宗教氣氛唔算太濃,都只係會唱詩歌咁。如果個老師三句不離基督就會好反感,依家咁都OK。因為讀ERS,我試過上台讀經,唔係基督徒都可以去參加果啲活動,同信唔信無關係,但其實學校內都唔係好多基督徒。

Martin: @Clara 我覺得學校執著成績多過宗教。

Clara: @Martin 有執著成績咩?

Martin: @Clara DSE past paper同學校卷比較,學校卷比較難,有注重到成績哩方面。

ANSWER 2: 我成日見到人祈禱,求耶穌乜乜乜,係咪當咗耶穌係工具人?係信耶穌,定係信佢會幫你做果樣野?咁叫愛上帝、愛耶穌咩?

召喚基督徒回答

Ken: 祈禱唔係叫神幫我地做嘢,而係求神幫我地行係耶穌的道路上面。成日見到好多唔公義嘅事發生時,我都會好嬲,我都會問,神係咪睇唔到?我會叫自己冷靜落嚟,只有祈禱呼求神,因為我哋唔知神嘅公義喺點,所以要求神幫我地行喺佢嘅路上。

Clara: @Ken 講神嘅公義,咁應該順從神嘅公義,定喺自己嘅公義。神嘅公義有無話警察打人唔啱?信唔信,都應該有自己嘅判斷。其實點解要冷靜自己?

Ken: @Clara 因為鬧警察喺自己嘅憤怒,而唔喺神的憤怒

Clara: @Ken點解你只可以有神的憤怒,而無自己嘅憤怒?

Ken: @Clara因為來自我嘅憤怒係罪,我唔想犯罪。

Clara: @Ken但唔應該盲目跟從,要有自己分析,唔喺神話乜就乜,要有自己思考。定喺有啲人咁,佢哋憎某件事,所以話神都憎,咁就係利用神啦。聽過好多人講,哩啲都喺神的旨意,病咗就喺神俾嘅挑戰,好返喺神嘅幫助,講到神咩都啱。病咗係自己唔好彩啫,講到挑戰咁,太過正面,好似唔啱。

Ken: @Clara我真喺有病咗好返哩個經歷,小學主日學旅行突然暈低咗,之後發現有肺病,要留醫好耐,果陣諗,點解神要咁對我?但有好多同學同老師嚟探我、幫我,令我明白到神比嘅苦難都係人忍受到。好返之後,諗返就喺一個經歷神的經驗。

Clara: @Ken同平時聽開差唔多,都係經歷咗一啲野先至信,咁都係你自己覺得。你可以信,但我唔信啫。

Catch: @Clara每個人都要有啲獨立批判思考,唔係人叫你做咩就咩,但點解上帝叫我哋做咩,我哋就做咩呢?如果上帝唔會無錯,咁佢就唔會被叫做上帝,哩個喺一個設定,或者信心。而點解會有信心?你話自己唔信,咁我其實反而想問返咩係信?信啲唔信啲、信但要再諗,係咪都喺信?揀咗自己無見或經歷過,但因為信人哋講就做,又喺咪無咗自己呢?

Catch: @Clara 好長氣添,希望唔會搞到好似強迫推銷咁lol

Clara: @Catch 都唔係唔明基督徒傳教的心態嘅,人人都係咁,黃絲藍絲都係會想說服對方。


Ken DM Catch

之前講到到公義同憤怒嗰陣,我自己有啲1999…我其實想講基督徒係可以對不公義嘅事憤怒,但係最終審判地上嘅係神。我哋唔知神嘅眼中,咩先為之公義,但反問自己,點解當初我哋會選擇成為基督徒?係覺得神係獨一確實嘅上帝?定係只係人信我信?我哋唔忍心不義嘅事繼續發生,但既然我哋選擇左相信呢位上帝,就應該對神有信心同盼望,我哋呼求神聽我哋嘅禱告,求神嘅公義降臨,求神幫助我哋軟弱。

同非基督徒的對話,其實幾有啟發性。呀其實我哋基督徒究竟信緊啲咩㗎哩,會對自己嘅信仰諗深一層。

亦都發現咗原來當世界愈嚟愈不義,基督徒擔當神嘅門徒,別人會挑戰我哋嘅信仰嗰噃,作為基督徒嘅我哋又會點樣面對時代嘅衝擊同挑戰呢咁樣。

當然,我自己係信一代,都俾同學問嘅信仰問題考起左。不過,令我反思基督徒其實要更加格守真道,衛護真理。


💻網頁:https://iscf.fes.org.hk/?cat=687
📱Facebook: https://www.facebook.com/catch.iscf/videos/945569545860989/
📱instagram: @iscf.fes
https://www.instagram.com/iscf.fes/?hl=zh-hk

©️香港基督徒學生福音團契中學部