Catchy 虛則實之、實則虛之

 

到底係唔係一定實體好啲呢?身為紙本雜誌嘅發行團隊,無理由倒自己米話實體唔夠網上虛擬鬥。不過,我哋其實都有喺網上分享內容,所以又無話絕對否定虛擬版本,畢竟襟個 share 掣就可以將內容快速傳開(雖然暫時《Catch》啲文好似都無試過被好多人share)。

好多人都期待咗疫情消退、限聚令解禁、可以實體聚會好耐。而復活節之後,個實體世界又好似真係復活返咁,同冬去春來回暖一樣,生活唔再被局限喺屋企,見人唔駛再靠用數據重組而成嘅影像,有返多啲溫度。好多人都忍咗嗰啲窒聲 lag 機嘅狀況好耐,又有好多人頂唔順對住毫無反應嘅黑色一格格,好期待可以實體聚會一齊敬拜唱歌做動作,唔需要再怕 delay 變怪聲同屋企無位。 

但其實就好似香港嘅春天,雖然無咁凍,但濕到啲嘢霉哂仲難頂。凍都話可以著多件衫,但濕真係唔知可以點避。係囉,團契聚會轉返實體,其實又有實體嘅麻煩同處理唔到嘅問題,都無話一定會全部變晒做好事。對好多人嚟講,限聚令一取消,佢就再無時間可以同大家網上聚會,要去返好多實體嘅課外活動。又或者好多人其實都唔鍾意實體嘅時候喺咁多人面前被咁多人望住去講嘢分享,但匿埋喺自選嘅 profile pic 後面,就容易啲表達自己其實諗緊咩。 


咁我哋又唔會喺實體團契嘅時候,去「想當年我哋喺 Zoom 開團契⋯⋯」,但喺唔同人以各自唔同嘅形式去適應時,我哋又會唔會局限咗自己,倚賴咗一個習慣同舒服嘅模式呢?唔知嚟緊,我哋會唔會進化到虛則實之、實則虛之呢?實體聚會可唔可以令到喺虛擬空間比較無障礙交流嘅人都一齊參與到呢?或者經驗過新常態後,我哋都唔應該再諗點樣回復到以前嗰種實體,而係去試吓打破各種限制,更加貼近唔同人嘅狀態,等更多人可以喺同一個群體之中好好咁享受相聚同交流。 

係啦,到底《Catch》幾時先可以打破實體同虛擬嘅限制,可以同廣大嘅讀者群有更多交流呢?