CATCH 134 寫咩好——《Catch》文字工作坊後記
「寫啦，寫咗出嚟就係㗎啦！」
聽落好伏，講到咁簡單咁，肯定背後有啲嘢，無嚟由登篇文喺雜誌會咁簡單。
其實就係咁簡單。
為咗破除大家對於投稿同文字創作嘅障礙，又為咗令到小編徵稿時唔會成日被誤認為騙徒，好久不見的《Catch》文字工作坊及作者的交流會低調地在11月時進行了。當天，得到《Catch》作者們和對用文字事奉有興趣嘅同學賞面出席，大家進行了一場好似無咩結果，但又有啲營養嘅交流。作者大大sss分享咗佢哋創作嘅初心、寫文小技巧同埋對文字發表嘅願景；而同學亦提出咗校園場境之中，以文字作事奉嘅困惑，以下有一啲小片段：
成日話哩個年代仲邊會有人睇字吖！？係啦，無人睇，咁點解仲會有作者想用文字表達呢？
「寫，只係將啲諗法表達返出嚟，等其他人可以見到。其實只係鍾意鬧人，寫嘢合理化咗鬧人哩件事，可以有我講無人講。但又其實我寫嘅嘢都唔算係鬧人，我都只係講道理，只係有啲人你同佢講道理，佢就覺得你鬧佢。」
「文字用來整理記錄思考，寫嘢其實都係為咗推廣自己心中所信，再放係文字度。」
「想寫畀信徒睇，想展示信仰可以點樣同個世界對話。關注點係基督教內，唔會太強護教性質。有時覺得係教會內大家嘅視覺（角度）問題，只睇教會而唔睇社會文化，應該多啲面向，去取回話語權。」
「以前試過睇一本都係FES出嘅書，覺得原來一離開教會嘅框架，就係去咗另一個世界，咁就會想試下用文字同同學講下一啲學校／教會團契框架外嘅嘢，希望畀同學／基督徒多啲理解，所以想用文字講多啲。我想用好好嘅文字，希望令到普通（非基督徒）同學都聽得明一啲信仰嘢。」
唔同作者，出發點都好唔同，有好個人層面嘅為咗溝通同埋整理自己嘅思考，亦都有好神學／好福音面向嘅，想基督教同世界對話，想學校／教會框架內嘅同學認識下外面嘅世界，而文字就係想做哩啲事嘅一個媒介。
咁點樣先可以落筆寫到呢？綜合返大家嘅講法，或者可以組成一個創作三步曲：
- 通常諗下自己想寫咩時，會睇返當時流行啲咩，同埋自己諗開嘅問題。如果想介紹書／電影，咁睇嘅時候其實就要有啲意識，mark返邊個位會想講。
- 起稿唔一定要用mind map寫好晒大綱，其實可以先打一大堆字之後再執返，整理返自己其實想講咩，點表達畀人哋睇會易明啲，覺得邊啲內容／用字多咗就唔要，諗諗係唔係哩段放前啲或者後啲會表達得更好等等。
- 寫完之後，自己睇多幾次，放低一陣，再返轉頭睇返幾次，又會執到一啲唔順嘅位要再改。亦都要搵其他人睇下，因為自己寫出嚟嘅嘢，自己當然會明，但其他人睇完，就會發現到某啲字句好似無表達到個意思，咁就需要改。
而落筆嘅心態上，以下嘅幾點都好值得大家一路寫一路記住：
1.要諗自己係寫緊作品，想人哋知咩，而唔係當日記咁，畀自己睇就算。
2.世界嘅事就係咁發生，人人都見到，但點解要寫文，因為作者切入事情嘅角度可以同其他人好唔同，作者點切入去件事度先係值得睇嘅部份。
3.寫文都係一啲取捨，如果寫到係人都明，有時就會太過平舖直敍，無咁好睇，所以要搵同目標讀者之間嘅共通部份著力去寫。
針對信仰／傳福音有關嘅創作的思考，亦有以下幾點：
1.寫《Catch》好似要寫議論文咁，要帶到好多諗法畀人，但其實係唔係都可以行下感性路線？即係好個人化好似寫抒情文咁，用好多靚嘅詞語，個人啲又主觀啲。
2.信仰唔應該得yes or no （對錯），講／寫的時候要留意有無過份自圓其說，會唔會只係用自己圈子內熟悉嘅內容同觀點，而無留意個世界，或者其他人其實點諗。跳唔出基督徒哩個框，好似就會變成一啲排他嘅自說自話，接觸唔到其他人。
3.在學校團契事奉時，其實都會想多啲同非基督徒嘅同學溝通，週會嘅分享或者IG宣傳都唔想用返傳統嘅信仰術語咁死板，但又怕用其他方法會講唔到自己想講嘅嘢，甚至失去咗自己嘅觀點諗法（世俗咗、唔屬靈）。
4.在溝通表達時，點樣可以同時見到自己又見到人哋呢？如果想有一啲互動，諗自己點樣回應對方嘅問題，其實係唔會失去自己嘅觀點嘅。回應唔到對方嘅問題，或者講唔到自己嘅觀點，反而應該諗返點解回應／講唔到。例如：係唔係自己對信仰嘅理解唔夠？
5.通常非基督徒會因為同自己嘅關係好，所以會肯聽下睇下一啲有信仰內容嘅嘢。試過會搵唔係基督徒嘅朋友同學幫手搞福音週嘅活動，當時同劇社嘅同學好熟，佢哋嚟幫手搞福音話劇時，了解咗我哋嘅劇本，間接會知道多啲基督教嘅嘢。
後來大家一齊brainstorm下，應該點樣處理學校團契嘅文字宣傳。首先，係要回歸初心，諗返「點解想佢哋返團契？」、「團契有咩吸引佢哋值得返？」。但用推銷心態，講到團契好好玩好精彩所以佢哋應該嚟，又用啲老師做賣點、講到咩都有（漁翁撒網咁），都會擔心用咁多吸引人嘅方法去展示咩係團契，會唔會其實仲衰，搞到佢哋嘅期望同內容不符？有時可能因為學校搞開嘅宗教活動都好悶，全部都係坐喺度，未信嘅同學會先入為主，覺得郁完都係要坐喺度，所以唔太有興趣。不過宣傳本身就係對住多好多好多嘅人講嘢，但聽到嘅人唔一定個個都會嚟，無嚟果啲就係下次宣傳嘅目標。不過如果啲活動真係唔吸引，好似查經週會咁多刻板印象，無論宣傳點寫都唔會好？咁就唔關創作事，係團契週會內容嘅問題了。
「會唔會搵啲同佢哋近啲嘅查經題目，活動中帶出佢哋想知嘅嘢？」
「淨係用一兩節經文可以好多嘢講，短短哋咁就會覺得好似想聽，太長就不了。」
「有啲Topic係反思，留返空間俾佢哋諗。」
「 係唔係可以歡迎同學嚟挑機，藉此開始對話？不過驚應付唔到？」
好多嘢，唔講、唔寫出嚟，其他人唔會知，又無得一齊討論。無論係哩類「工作坊」，定係《Catch》，其實都係一個空間，一齊試下點樣可以將大家各自嘅諗法表達得好啲，大家可以有多啲交流。希望今次哩一篇唔太詳盡嘅記錄，會幫到大家在創作／團契路上有多啲諗法。
