四月十五日『福哉右盜』-李嘉翔著

閱讀經文：路加福音23:32-49

耶穌臨死前，「六尺懸垂二盜齊」。路加特別記載三位死囚喺十字架上嘅呢段對話：

左邊（據稱）嗰個同佢腳下全世界嘅意見都一樣，鬧耶穌：「你冇鬼用㗎？你咁勁、係救世主嘅話，咪show吓本事，解救吓你自己、順便救埋我呀大佬！」

右邊（據稱）嗰個就駁佢：「我同你都係死有餘辜㗎！但你鬧緊呢個人，佢係無辜㗎！」之後仲同耶穌祈禱：「將來唔知幾時你東山再起，記得關照小弟呀！」

中間嘅耶穌，聽到佢伸冤同呼求，同樣痛住咁答佢：「唔駛等將來幾時，今日我就同你喺樂園裡面啦！」

苦難面前，全世界（包括好多宗教教徒）都係祈求消災解難、趨吉避凶。佢哋同左盜同聲質問基督：你唔消災解難，唔救我、唔滿足我嘅話，憑咩要我信你呀？

同時，唔少基督徒，心裡有種信仰帶嚟嘅正義感，相信最終嘅善惡報應。佢哋同右盜一齊向基督祈禱：我有為你發聲㗎！而家受苦唔緊要，將來記得救我呀！

但耶穌臨終揭示嘅福音係：我落嚟，就係為咗受苦，同你一齊受苦。有D嘢比起消災解難更重要。救恩唔係發生喺末日，係今日。天堂唔喺遙遠天際，天堂係喺呢度——我哋一齊受苦之處。

聖經記載段對話咁就完咗。你心中嘅福音，本身係點嘅呢？聽完呢段對話之後，如果代入右盜，你又會有咩說話，想回應耶穌嘅呢？

祈禱：

天父，當我喺苦難試煉當中，求祢以耶穌嘅遺言提醒我：祢畀我最寶貴嘅禮物，就係祢嘅同在。願祢嘅同在賜我力量，面對生命前路。阿們！

#復活節 #中學生日常 #路加福音
#吾靈修 #靈修 #idontdevotion      
 #中學生靈修 #ISCF #中學生 #2022     
#基督徒 #基督教文化運動 #deltaδmovement  

======================      
關於我們👥： https://iscf.fes.org.hk/?p=390    
Instagram📱：idontdevotion  
《吾靈修》專頁💻— https://iscf.fes.org.hk/?cat=1045     
聯絡我們📧：  [email protected]    
======================      