Catch 134 《Hypersonic Lab X 流散者們》

deltaδmovement
相信有留意開唔同基督教Page嘅朋友,
#deltaδmovement(基督教文化運動) 都唔會感到陌生。
但你又知唔知#deltaδmovement 背後蘊藏嘅故事同理念呢?

▪ #deltaδmovement 四項重點▪
去中心化
共享資源
開放協作
保持獨特

「 呢種「教會」嘅生活形態可以讓人有更多嘅想像 」

疫情期間,Hypersonic Lab嘅Harold同流散者們嘅阿Sing留意到越來越多基督徒喺社交媒體上,自發透過文字、藝術等見證神。而本身好希望喺呢個基督教圈子裡作出改變嘅佢哋,就因為咁發起咗#deltaδmovement,希望可以凝聚到呢一班信仰上嘅同路人,讓更多年輕人可以一齊建構教會,藉著個人恩賜多面向咁呈現信仰。

阿Sing認為, 呢種「教會」嘅生活形態讓人有更多想像,並且可以喺星期六、日教會崇拜以外呈現信仰;而Harold又表示,自己透過#deltaδmovement 認識咗唔少有心、有才華嘅製作人,平時得閒就會出嚟傾下計、食下飯,已經逐漸建立緊一種新形式嘅「教會」。

佢哋話,雖然一開始並冇期望呢個hashtag會帶嚟好大嘅改變,但經過一年多嘅時間,而家嘅效果已經遠超預期。現時#deltaδmovement 喺Instagram大概有10000+ Posts、接近200個內容創作者;當中包括個人、小機構,甚至大機構開嘅Page。自從近幾年的社會事件後「去大台、去中心化」成為咗一眾網絡媒體、平台不謀而合嘅共同理念同新嘅模式。因此#deltaδmovement 唔係一個「聯盟」,背後亦冇「大台」,而係一個由大家自由演繹、參與嘅運動。創作人可以喺當中搵到同路人互勵互勉;而讀者亦可以透過閱讀、欣賞作品,以更多角度思考信仰。

「千祈唔好睇小自己做嘅野」

面對媒體工作環境暗淡,阿Sing認為喺網絡上創作嘅基督徒更加應該發揮創意,繼續將自己對社會狀況嘅反思或信仰價值傳遞開去。「千祈唔好睇小自己做嘅野,即使再小嘅嘢喺網絡上一定會有共鳴。」參與#deltaδmovement 每一個人,都好似有一種獨有嘅Mission(抱負),例如有人好想基督教音樂成為主流,有人想透過手寫經文帶來正能量等等,這些都可以透過網絡推動實踐。就算只係小小嘅創作,可能都會喺無意間觸動人。

所以,如果睇到嚟呢度嘅你有感動,好想鼓勵你把握機會,千祈唔好浪費上帝畀你嘅恩賜,亦唔好睇小自己所做嘅事。

期待喺#deltaδmovement 搵到你嘅Page,同你一齊欣賞、思考同實踐信仰,一齊並肩同行!


(本文來自2021年DSE暑期門訓計劃中關於Detla Movement基督教文化運動的研究)