Catch 134 《捕風捉影》

當你居然會睇到Catchy哩一頁，相信你都係Catch嘅資深讀者，容許小編厚顏無恥當你係我哋嘅粉絲。

今期本身想做一個關於Mirror12子的企劃，覺得可以好似12門徒咁咁咁。但最後，變咗一本偽娛樂雜誌，仲講埋Error、C all star，連Curry都出埋，真係幾估唔到。

有關追星，近年多咗人會話鍾意一個明星係因為佢夠真，其實都唔太明連我哋哩啲小小嘅雜誌出嘅稿都好多包裝，都諗緊點樣賣真時，大明星經過個咁多鏡頭同包裝之後，睇到嘅真係有幾真呢？經理人公司幫偶像明星包裝做某個可以吸引我哋消費嘅樣，而唔出得街嘅嘢，永遠都唔會畀佢出到街，因為出咗街就好多時變咗醜聞，然後好多人要討論好耐其實係唔係真。

追星都係人生，其實都只係啲捕風捉影嘅空虛。

睇得好化咁，其實仲要唔要放真實嘅自己出街呢？定係，我哋都要好努力咁包裝自己成為理想嘅一個我？哩個自己又會係點樣呢？從追星去諗：想自己成為好似明星咁樣嘅人，所以將自我投射咗去個星度？有時係覺得自己身邊嘅人同事都好悶，所以將所精神心思投放喺個星度？但有時都只係因為成班朋友一齊追，個過程好開心，所以就咁投入？

咦，咁似大家返教會返團契咁嘅？教會其實就係經理人公司，將耶穌包裝做某個可以吸引我哋「乖／好」嘅樣。「我哋要專心跟隨耶穌，要學似耶穌咁ABCDEFG。」教會成日咁教我哋，但我哋好似無論點追住耶穌，點學都仲有好多嘢被人話唔啱、唔似、唔得，係唔係我哋哩班粉唔稱職。

或者參考下新約時代耶穌嘅一個「瘋狂粉絲」？佢用好貴嘅香膏淋耶穌，其他人話佢搞咩咁浪費，啲錢點解唔攞去幫窮人。當時耶穌係話，由佢啦，唔好為難佢。其實佢比起其他當耶穌係星咁追嘅人，更加真誠面對自己嘅心意，又更加貼近耶穌嘅狀態。當年好多追隨耶穌嘅人嘅理想／信仰，喺佢死咗之後就幻滅咗，以為自己被呃，轉去追其他星，咁今日我哋又係咩心態呢？