CATCH 134 COVER STORY 《如果有個週會講明星⋯⋯？》文字版

*本故事純粹虛構，如有雷同實屬巧合

「⋯⋯求主幫助我們有智慧善用時間，在學業上向著標竿直跑，應付好兩星期後的考試。奉主名求，阿門。」 

團長帶領眾人禱告後，週五放學後的團契便結束了。 

小鏡隨即抓住了小咖哩，準備以九秒九的速度，跑向在村裡的M記。 

「都唔明你走得咁快做咩，難得團契後可以成個場霸哂，冇人同我地爭場打波。我仲要練好啲三分，你知㗎啦，我學界Curry嚟㗎嘛。」小咖哩望著球場的籃框說著，右手模仿著NBA三分王Curry的射姿。「壓手，chop!」 

「學界浪射王就有你份。快啲啦，陣間畀人搶哂啲卡，又要食炒價。」小鏡跳起裝作Block Shot，然後捉住小咖哩的手，準備穿越馬路，去M記訂雞餐。「今日呢，第三週第一日出呀，有隊長又有濤濤，是但抽中一張都掂啦。」 

「喂阿哥，你已經成屋都係精品，早兩日同你出旺角又買咗堆，上次喺九展演唱會又買咗堆，你都好有米啫。」小咖哩反了個白眼說道。 

「我有米？而家食個下午茶，先嗰$25，見你咁好陪我排隊，買個$80分享盒請埋你食啦。」 

「仲好講？你食咗兩個禮拜啦～已經。當初又話熱氣從此唔食老麥，人哋一出鏡仔卡，你就生晒飛滋都要繼續食。」 

「你又好好咩，年年Curry特別版波鞋，唔同色又要一對，連波襪都要齊款，你有幾多對腳呢學界Curry？」 

小咖哩駁唔到，因為今早七點正先上網同人鬥快撳咗件限量版波衫。 

「316號。」 

小鏡拿完外賣，向小咖哩提議：「不如返團契室食啦。」「是但啦。」 

回到團契室，他們望著團契室的壁報，釘著不同活動的相片，又大大隻字釘著團訓：「約翰福音三16」。 

「你話如果團契講下鏡仔，應該好多人有興趣。」 

「你話如果團契講下NBA，夠好多人會返啦。」 

「咁點解我哋團契咁少人返呢？」「Er…唔夠吸引囉。」 

「你有冇睇尋晚個集個啲評判嘅comment？嗱，個package係幾好，不過冇星味囉。」小鏡一邊說一邊吃著炸雞。 

「你好似未祈禱喎，因住肚痛呀你。」小咖哩說畢，立刻低頭兩秒：「求主潔淨食物，阿們。」 

「又唔係正餐，是但啦。喂，你睇吓張出席人數統計，第一個星期永遠係最多人，跟住越來愈越少。」 

「鬼咩，一開始又宣傳、又遊戲、又有嘢食，之後一嚟就查經。查經喎，點叫人返？小錯次次早會上台宣傳團契週會都好老尷：『各位同學，今日週會內容係查經、係聖經問答比賽。』」 

「咁⋯⋯所以咪話下次開團職會，真心建議改下內容啦。」 

「講過啦，啲老師好堅持要有聖經呀。大佬，我哋返慣就話啫，叫啲新朋友喺到聽你講經，點頂呀。我成日都見到啲新朋友，係咁望住隻錶，唔好意思中間走，等夠鐘就即刻走。」 

「個package係好，但點解唔吸引呢？」小鏡喃喃自語。 

「喂，你有冇聽我講㗎？」小咖哩拿起一條薯條，以標準的拋物線射向小鏡的頭上。 

「即係咁，」小鏡以哲學家的口吻回應：「係人都知聖經好、耶穌好，個package係好㗎，但點解啲人唔鍾意聽？『吓，又講耶穌？』『咁悶？』」他模仿著一些同學的拒絕。 

「所以咪話囉，如果啲週會講下鏡仔、講下NBA、講下動漫、講下大家有興趣嘅topic，團職自己都有動力邀請下人嚟呀。唔係下下都俾人拒絕，人地見到我地都自己走開啦。」 

「咁點解我哋會對呢啲topic有興趣？即係咁，點解你會對Curry有興趣？」 

「佢勁囉，」一說起Curry，小咖哩立時提起勁：「人哋點mark佢都射得入。射到破哂紀錄，又冠軍又MVP，佢個人又勤力，人品又好。仲要呀，佢係基督徒，對鞋寫埋金句添呀。」 

「咁你如果搞個NBA週會，要分享Curry，你會點搞？」 

「梗係講佢點樣開始打波，然後點樣成長、苦練又成長、失敗又成長，點贏總冠軍，之後點樣輸咗但又企番起身⋯⋯」小咖哩說得津津有味，腦裡想像著自己在台上分享著。 

「我都想咁樣搞個鏡仔週會，同人分享下我點解咁鍾意佢哋。佢哋呢，真係由零開始，一開始有啲隊員唔識唱歌，有啲就唔識跳，到而家成長咗幾多呀。仲有呀，早排有個節目講佢地個啲唔得嘅地方，個個喊哂出嚟，睇到我都喊埋一份。我覺得佢地好有血有肉。」小鏡由衷欣賞這群藝人從來不是「偽人」。 

「啱呀，週會咁先正㗎嘛。」 

霎時間，他們覺得團契是有盼望的。 

「但係呢，呢啲又點同耶穌有關呢？耶穌咁勁，佢有神力，咁OP，咩都得。你知㗎啦，次次我哋係團職會提議啲新嘢，啲老師都係問我哋『咁同聖經有咩關係呢？』」小鏡依稀想起每次團職會有新idea後被reject的慘況。 

「你咁有諗法，度下啦，我都被人reject得多。要有聖經㗎～記得。我怕團契咁搞落去，會摺埋。」小咖哩苦笑著，寄望於常常有新idea的小鏡。 

「Er⋯⋯我都唔知喎⋯⋯有血有肉⋯⋯同耶穌有咩關係⋯⋯」 

「同學，夠鐘鎖門啦。」工友成叔大聲喊道。