四月十七日『最神秘嘅神蹟』-李嘉翔著 

閱讀經文：路加福音24:1-12 

眨眼之間，今年嘅預苦期原來已經嚟到最後一日。呢段時間，你生命有冇咩改變？ 

又一個節期、又一篇ig靈修文、又一段聖經，有時的確帶唔到d咩好大改變。始終眼前見到嘅嘢，對我哋人嚟講，先顯得最真實。近有唔知幾耐先抗完嘅疫，遠有唔知幾時先打完嘅仗。冇咩新聞會令人覺得世界有救，冇咩跡象顯示明天會更好。 

二千年前，個個門徒親眼見住自己大佬耶穌，辛辛苦苦傳道三年幾，最後畀人害到慘死十字架上。同你一樣，心諗唔灰就假。有人話佢復活咗？你班女人唔好玩啦，噏完早d瞓喇。 

回顧返，預苦期一開波，已經宣告一個真相：人性係軟弱嘅。其實人最軟弱嗰個位，就係太易相信自己見到嘅嘢就係全部真理，jump into conclusions。咁樣，反而係阻隔緊我哋明白真理。 

我哋眼前「見」到嘅事情，都係一個個realities，人都係期待見到神蹟，先相信上帝；但係世界背後嘅真相——Reality——卻係由「聽」開始，上帝講嘅真理，你唔聽，畀你見到咩神蹟都好，你都係唔會信。 

所以，史上最重要嘅神蹟——耶穌復活——無人親眼見證佢嘅發生歷程。最初只有兩個唔知邊度嚟嘅神秘人提供見證；而佢哋講嘅冇咩嘢新鮮，只係覆述返d你可能都一早已聽過嘅事實：「一早講過畀你哋聽㗎喇：人哋話咗一定要死咗第三日復活嘛，做咩仲過嚟搵佢呀？」耶穌後來仲顯現埋畀好多人睇，唔聽嘅「許多人依然疑惑」、「不敢相信」、「還不明白」。 

當我哋對眼期待見到外在環境改變，先肯改變自己，上帝要我哋個心首先肯將佢講嘢聽入去，先經歷到神蹟大能。呢個就係信同唔信嘅分別。上帝唔喺d外在死物度，上帝喺佢嘅話語、喺我哋同佢相處嘅回憶裡面。 

係㗎，當你聽日再開ig，都係會見到呢d文、都係嗰d新聞。你期待世界先改變？定求上帝幫你改變自己先？ 

---

禱告： 

天父，求你開啟我嘅心，幫助我相信一個超越現實（realities）嘅真理（Reality）：主宰世界嘅耶穌，現活喺我心中。即便世界如何，提醒、幫助我：首先改變自己。阿們！ 
 
  

©️香港基督徒學生福音團契中學部       
 
#最神秘嘅神蹟 #世界沒有變 #人性的軟弱 
#那一個真相 #不是看是聽 #你願意相信嗎 
#改變自已先 #復活日  #中學生日常 #路加福音  
#吾靈修 #靈修 #idontdevotion        
 #中學生靈修 #ISCF #中學生 #2022       
#基督徒 #基督教文化運動 #deltaδmovement    

======================        
關於我們👥： https://iscf.fes.org.hk/?p=390      
Instagram📱：idontdevotion    
《吾靈修》專頁💻— https://iscf.fes.org.hk/?cat=1045       
聯絡我們📧：  [email protected]      
======================