Catch Archive 【ISCF】「息.基」之後  

  

我好感恩上帝俾我有機會嚟到IS Camp去學習安靜。  

日常生活節奏急促,我哋嘅大腦永遠响度高速運轉,好多嘢我哋唔識停,忙起上嚟根本去到最後連自己忙緊乜都唔清楚。 

喺camp入面我第一次真正體驗到心靈上咁充足嘅休息。嗰種感覺好奇妙,我哋可以隨便搵個舒服嘅姿勢去思考,又或者去感受自己嘅呼吸。  

最令我印象深刻嘅係第三日嘅帆船環節。重點唔係我有幾興奮,而係我能夠從一個唔同嘅角度去回望我所居住嘅呢片土地,同埋細心聆聽上帝從掌舵帶俾我嘅訊息。呢個環節提醒我,無論發生咩事,上帝依然會引領我哋,就好似風會帶著帆去唔同嘅方向,雖然一切都係未知,但眼前豁然開朗。  

第三日晚上嘅沙畫環節,我好感恩上帝俾我聽到阿傑嘅分享,佢嘅說話令我反省自己嘅信仰狀態,亦都係得呢個camp先至俾到我一個空間抒發自己嘅情緒。  

我好感恩我融入咗一個包容性咁強嘅團體,大家喺我唔開心嘅時候會好尊重我嘅感受,尊重我嘅說話,甚至喺第二朝,有組員主動遞信俾我,對我嚟講係自責過後極大嘅安慰。我好多謝呢班僅僅識咗幾日嘅朋友,係佢哋令我體會到乜嘢係主內弟兄姐妹互相扶持,不致跌倒。  

直至出咗camp,我先至明白呢四日三夜對我嚟講係幾咁珍貴。因為出到嚟,身邊人嘅包容性細咗,想安息亦都冇咁容易。希望自己嚟緊都可以繼續調節自己嘅生活模式,達致理想中嘅「息 • 基」。  

Angela   

  
  

今年是我第一次參加IS Camp,初初我以為這營會會玩一些歷奇活動,但原來是十分有意義。  

在過程中,我覺得自己感到平安,因為有時間給我安息,坐在帆船感受著海上那份平靜。 其實這次營會對我十分有幫助,因為我自己在暑假十分忙碌,而這個營會給我安息,讓我將所有煩惱的事通通放下,我感到不再煩惱。最深刻的事有很多:第一,營火會,當我面對那團火,我覺得自己好像摩西一樣,同神親近;第二,坐帆船,感受海上的平靜,很舒服。第三,畫沙畫, 利用沙畫畫出我的故事。我最鍾意就係藉錄音記錄自己的感受,然後聽其他營友的分享,再寫紙鼓勵他們。可以聆聽別人的感受,再鼓勵,可以更了解別人多一點。  

我覺得安息對我好重要, 因為給自己做很多煩惱的事會令自己的心情變得煩躁,安息可以令自己感到平安。有時可能因為某一件事而過份去做,結果搞到自己不安,甚至影響自己,但這次營會教導我如何去安靜,給自己安息,心情會變得不再煩躁。  

完咗這次營會,我希望可以實踐安息,唔好為咗一件事而盲目地做,給自己一個安息的時間,放鬆自己, 去停止、去休息,別忘記享受及知足,以及擁抱身邊的人,神是我的供應者,期望祂可以幫助我,給我平安,使我感受祂所賜我的在基督內的安息。  

「凡勞苦擔重擔的人可以到我這裡來,我就使你們得安息。 我心裡柔和謙卑,你們當負我的軛,學我的樣式;這樣,你們心裡就必得享安息。 因為我的軛是容易的,我的擔子是輕省的。」  馬太福音 11:28 – 30  

Thomas