P：和煦的晴天 

C：金魚 

D：神的國在加州 

P：其實係一套舊戲，當初因為睇咗一個 YouTube channel 介紹，所以想同大家一齊睇。其實叫大家自己睇嗰條 YouTube 可能仲好，不過我哋都傾吓啦。 

獨裁唔好但我哋都會揀？ 

P：條片一開始講大家對獨裁主義嘅理解，即係德國嘅希特拉、納粹黨哩啲唔好嘅歷史。但從條片，原來獨裁主義好容易發生，人嘅諗法好易被改變，一個五日嘅實驗，就可以令人主動參與獨裁主義體制，咁哩種體制裏面都好似有啲好嘢咁。不過獨裁主義用嚟吸引人時所強調嘅，好似人人平等，可以一齊做好多嘢嘅哩啲美好，其實唔存在。戲中嘅人本身一開始有好多美麗希望，後來就好多失望，最後就扭曲哂，同個體制一齊 fail 咗。我睇完之後個腦浮現咗：「唔存在嘅烏托邦」。 

C：睇完戲咁啱又幫人補習講到法國大革命，當中講到自由主義及民族主義，而當時嗰啲領袖卻選擇咗被獨裁。自由唔係好啲咩？點解當時嗰班有識之士會揀獨裁？教育真係有用？其實唔同體制都各自有好靚嘅地方，但當有人參與之後，理念就變得扭曲。人為咗追求理想，就會去做好多殘酷嘅事。 

P：我就會諗，戲中哩個實驗過程出現嘅理想有咩錯？唔係應該人人都鍾意自由咩？點解會揀獨裁呢？戲中講支持哩個獨裁體制嘅人，喺原本嘅生活中面對好多唔公平，好似嗰個被家人忽視、利用嘅男仔，喺哩個烏托邦度，終於好似被見到。而睇返戲中關於群體嘅一幕，講佢地玩水球由開始一直輸，到後尾好多人支持終於得咗，其實係會幾開心。新嘅制度會有人支持，因為佢令到社會角色同資源分配大洗牌，原本被忽視嘅人，就可以得到支持，過好啲嘅生活。 

C：我覺得片中好多人，一開始唔係追求獨裁，而係想要嗰份團結。好似我哋咁，會想 group 埋一齊，去討論同搞一啲自己鍾意嘅嘢。讀書會又好、搞音樂又好，都係想 group 埋一班人互相傾計玩遊戲。但依家個社會無時間畀人，要搵到一班人互相分享興趣，有得講又有人聽係好難得。 

P：其實我哋日常生活中，好多組織或者活動團體都會用返戲中嘅手法，例如整件隊衫大家著得一模一樣、嗌口號等等令到人團結嘅嘢。而哩啲手法塑造緊一個好似好美好嘅畫面，大家好似變得公平，可以交流。但套戲都話，好快就會出現一啲扭曲嘅事。好似當個老師成為獨裁者後，就要求所有同學答問題時一定要企起身，去建立自己嘅權威。有同學提出坐喺度其實都可以答，無必要企喺度時，佢就包裝到哩個要求係「為你好」：企起身可以促進血液循環，個腦會靈活啲。戲中有好多位展示哩一種，將建立權威嘅事，扭曲成「為你好」，然後潛而默化，人就會喺哩啲細位度慢慢服從。 

C：我有上莊，一開始覺得一班人團結一齊搞活動都幾好，但成個制度好 formal，好多唔知為咩嘅要求，搞到人反而無咁團結。其實個制度好影響個團體，成日都見好小嘅嘢就可以被用嚟扭曲一啲事，例如戲中答人問題嘅方法咁細微，都會扭曲成咁。 

P：獨裁主義最恐怖嘅，係拋咗一個好美好嘅畫面等大家一齊去追尋，但嗰個美好其實要求緊大家捨棄更多好嘢。另一個套戲展示出令我心寒嘅位係，原來好多時好扭曲要人歸順嘅事，其實都係團體內嘅人為咗討好獨裁者自發諗出嚟。唔係個獨裁者指示，而係嗰班追隨者自己諗出嚟去剝奪自己嘅自由。都幾似依家社會上發生嘅事，好多時我哋都會不經不覺，慢慢認同兼自我剝削，捨棄自由。 

為咗自己嘅團體，可以去到幾盡？ 

D：好多問題其實都只係需要換個包裝換個名，咁啲人就會覺得可以接受。要維護一個制度，過程所用嘅方法其實都差唔多，只不過參與嘅人有無察覺啫。戲中個老師唔會講明佢搞緊帝國主義同法西斯，但當中令人有投入感同優越感哩啲手法，其實就係獨裁主義成日用嘅嘢囉。 

P：其實套戲一開始，都講嗰班學生生活上無目標、好無聊、無所事事，突然有個老師教新嘢，畀咗一個可以好多人一齊建立一啲嘢嘅畫面，對佢哋嚟講係好美麗好吸引，所以個組織就成立到。但去到片嘅尾聲，成個團體嘅人坐埋一齊，老師問佢哋：「係唔係我叫你哋做咩就做咩？咁其實我哋同納粹有咩分別呢？」當人身陷組織當中，就會無咗自己嘅底線。唔理咩人，組織／獨裁者叫你殺，你就殺嗎？好似納粹黨時期嘅軍人同秘密警察咁，佢哋就可以為咗組織為咗獨裁者無咗條道德底線？對照返戲裏面班學生，坐喺大廳度面對「係唔係我叫你哋做咩就做咩？」哩個問題時，突然醒一醒，諗返自己條底線喺邊，都幾震撼。 

C：如果佢哋真係殺咗，相信都會有好多理由去合理化自己哩個行動。好多人都會為咗合理化自己嗰啲失去理性嘅行動而作啲理由，純粹係為咗保護自己喺個組織度得到嘅信念及自我身分認同。 

P：電影畀咗好好嘅提醒，無論身處咩組織，都要諗自己應該做得幾盡，要唔要傷害人同埋排他？戲中嘅角色安排，其實都有將社會唔同類型嘅人投射進去。佢哋嘅共同點，都係缺乏對人嘅關注，缺乏愛、無人見到。每個人咁投入個組織，都有自己好個人嘅理由，好似男主角，都只係想證明自己可以叻過女朋友。雖然我哋依家成個社會都追求緊自由平等，但仍然有好多受苦不安嘅人，會想透過貢獻（接受佢哋嘅）組織，從而得到優越感去建立自我形象。 

C：但佢哋並無發現，佢哋走去做嗰啲滿足組織裏面嘅人嘅事，根本無佢哋諗得咁偉大；佢哋咁樣傷害他人，其實只係為咗得到關心或尊嚴。 

其實點樣先係一個好嘅群體？ 

D：咁如果眼前嘅狀況唔太差，好多人都會認為依家做緊嘅嘢係必然嘅，唔會有新嘅諗法。以為人人都滿足到，咁就唔駛改啦。要覺得有嘢唔 work，對現實不滿，先會提出異議。我會諗世上冇完美嘅團契／教會，因為你一參加，就係破壞咗佢。我以前喺天主教中學，裏面有基督徒團契，係咩學生都 welcome，唔同信仰光譜、唔同屬靈傳統都可以加入。我當時做中學團契職員時，帶住理想入去，但原來我嘅理想就已經破壞咗個團契裏面本身有嘅文化。 

C：我身為中途加入中學團契嘅人，見到佢哋同我有啲唔同，亦都同我 expect 嘅團契有啲唔同，有啲衝擊。成日都會諗，佢哋係唔係可以接納到我呢？自覺同佢哋格格不入，所以好多時都會覺得孤獨。依家諗返轉頭，又唔會講得出有咩好明顯嘅唔同，但嗰種格格不入令到我好唔舒服。但後尾有班人有相同目標，搞咗聯校祈禱會，係我喺團契最開心嘅時間。 

D：講起格格不入，我中學信主之後返嘅教會，係由一班「信二代」組成，佢哋話同我傾計好似係一定要傾信仰，唔可以講玩呀食呀咁，其實都唔知哩個群體對於自己嘅諗法係咩。可能我嗰時對住佢哋有種格格不入嘅感覺，所以就會想搵啲都係覺得同原本群體格格不入嘅人一齊，咁就係我當時嘅聯校團契。當時 ISCF 同工同我哋同行，有人明白自己嘅處境，對我嘅成長嚟講係一段好重要嘅時光。而當年聯校搞福音營合作嘅朋友，到依家都仲係好好朋友。所以，我諗有時，如果喺 A 場境經驗唔到歸屬感，去第二度試吓可能就搵到。都唔係話哩度好、嗰度壞，只係人嘅組合咁啱同自己唔夾，都係好自然嘅事。身為學生去搞團契，大家期望會做到咩？有咩可以發生？用咩去維繫？校園文化本身係咩？會唔會有啲共同目標咁？哩啲問題，係我當年喺 IS 團長組時經常被問起嘅。 

個人化的共同目標可以係？

C：我團契依家靠 Zoom 維繫，有人講一個大 topic，講完分組傾下大家有咩睇法。我覺得維繫唔到團契，最大嘅原因係，團契並無好似戲中大家所追求嘅common goal（共同目標）。如果有好大個目標，好似搞聯校祈禱會或者 camp 哩類短期又好大嘅 common goal，大家就會想投入付出。但無咗哩啲，困咗喺屋企，為咗責任去聽，就會好似戲中唔知每日咁過有咩意義咁。 

D：無 common goal 哩樣嘢，得返一齊喺 Zoom 參加團契，同上堂一樣咁，希望唔會好似係常見嘅一問一答加埋 dead air 咁啦。反正依家 Zoom 搞唔到咩，不如就傾計啦，點解要上堂咁呢？好多時，喺學生嘅團契中，主導嘅角色都喺老師或導師身上，唔知同學會唔會自己搞啲嘢，有多啲參與呢？如果被迫參與，做咩都係被指派，咁就唔會有期望。諗返當年，如果我對住我嘅團友，有多啲開放、多啲包容接納、多啲愛心，或者大家會享受多啲。 

P：好似戲內，先唔討論獨裁主義好唔好，但都展示咗維繫個團體，係要團體內嘅人自發做啲嘢，要建立團體嘅自發性。我當時返團契返到好混混噩噩，好似導師做主導，參加嘅團友或小導師無諗過，亦無被問過佢哋想得著咩，直到入大學搞 O camp（迎新營）之後，就好想放哩啲元素入去。雖然 O camp 都係玩，但會有個思考嘅環節，好深入問吓點解想讀哩科、入哩行，有咩期望，最後仲會寫信俾自己。唔係話要照抄個format，但要有個位同空間，畀大家諗下，自己個人想點、做咩。哩個時間要個人啲，因為成班人一齊就會考慮到其他人對自己嘅睇法，為咗面子唔會想講咁多自己嘅問題。但導師可以引導佢哋去問返，到底生活上點樣需要神？咁成個團契成長方向就會個人化好多，有多啲歸屬感。 

C：有 personal 嘅 common goal 好難得，我覺得喺中學團契嘅自己有啲似戲中嘅女主角咁，見到啲嘢覺得唔妥，會想試吓有無得變好。團契好多人會一齊玩，但唔會講太多信仰嘅嘢，再加埋自己覺得格格不入，就會諗吓有咩可以加入去一齊做，諗下想團體有咩改變。但依家變咗諗點解自己要 keep 住返一個雖然間中有驚喜但無咩歸屬感嘅團契。有時一個人坐喺度，係唔會諗自己需要咩。可能會覺得唔開心，但唔會諗到自己需要咩、想點樣改變。如果有類似導師嘅人，喺哩個位同佢交流返，知道佢個人好需要啲咩，咁就可以由團友嘅需要開始，互動地去搵個人化嘅目標。 

P：如果有契機可以畀女主角嘅意見出到嚟，咁劇情係唔會咁走。件事欠缺咗一個機會，只要佢可以講到佢諗咩，就會有嘢發生到。 

D：從導師嘅角度嚟講，放手係一個過程，想團友參與同投入，係要多啲互動，唔係就變咗好單向，導師同工覺得／睇到佢哋想要咩，但對方唔一定認同。哩種落差成日都發生。到底咩叫做牧養帶領，可能都係要諗多啲個人化。導師係唔係完全無方向畀呢？有啲嘢導師睇到，團友未必睇到。哩個時候導師就係要鼓勵佢踏出多幾步，挑戰佢哋等佢哋諗多啲，或者應該約埋食多啲飯，搵個地方繼續傾，重要過喺團契限定時間內完成嘅教導。 

（下刪千字做導師嘅心得） 

金魚 
人生不是一種享樂, 
而是一樁十分沉重的工作。 

神的國在加州 
福音派教會出身,漂泊到崇尚自由的加州,讀一間基要保守派的神學院。點解?神有佢心意呱。我估。 

和煦的晴天 
鍾愛從電影思想信仰和生命功課。每天忙碌生活，緊記要停一停，胡思亂想一下。