與FES中學部的相遇 由查經開始
作者：江丞謙 Jaymond
大家好，我係黎自沙田崇真中學嘅丞謙，好開心今日可以同大家分享。
記得係中四嘅時候，其實我每日返學嘅生活都幾重重覆覆，雖然我冇因此就咁 burn out左，但就係周而復始嘅身心疲累，不斷消磨緊我想去同上帝連結同對話嘅心志。有時望著本聖經，都唔知點讀好。個心好想去改變自身同周遭環境嘅問題，亦都想更竭力嘅去事奉上帝，但都冇去好好認真嘅去處理，可以話係又頹又愁。
但後來有幾次中學部嘅同工黎學校帶查經，我先發現原來查經可以咁有趣。除左不時睇到聖經中嘅亮光，將神嘅話語連接返我嘅生命。更重要嘅係，喺嗰段時間，我發現除左忙碌之外，係因為自己信唔得過上帝有能力解決問題，所以先唔似初信咁不斷睇聖經。甚至我覺得自己咩都識晒，又有高人一等嘅智慧，完全了解晒上帝，所以先冇動機去同上帝說話。依份嘅喜悅係何等奇妙，後黎我都邀請其他團職一齊搞查經，將大家係繁忙嘅生活中，拉返去以聖經為本嘅生活當中。
我諗一個團體唔為左有聚會而去聚會，亦唔係為左將“週會”依個名詞塞入去行程中而有週會，而係如聖經希伯來書10:24-25所講 “ 又要彼此相顧，激發愛心，勉勵行善。 你們不可停止聚會，好像那些停止慣了的人，倒要彼此勸勉；既知道那日子臨近，就更當如此。” 係ISCF嘅聚會裏面，我感受到同工係準備緊我哋嘅心志，引導緊我哋去學習，用諸般嘅智慧去reach校園裏面嘅信徒同未信者。ISCF亦係一個平台，比我認識其他學校嘅人，開闊左我嘅眼光，令我重新思考學校團契同教會嘅聚會模式。
雖然同ISCF同工嘅相處時間唔太長，我卻見到信仰嘅真實。記得嗰次IS camp，的確令我諗返起耶穌到來，係為要釋放我哋於自身嘅罪，以至係罪帶黎嘅苦毒，激發我去面對生命中嘅問題。有時都幾有別於過往被灌輸嘅方式，而係真係可以比我自己去探索一下。係依段嘅時間裏面，參加ISCF嘅活動對我黎講，係信仰路上，一個小小嘅里程碑同印記，由爬下爬下嘅BB，開始識跌跌碰碰咁行。
總結而言，其實ISCF推動左我去更認真去與神相處，以至我係查經同聚會上有新嘅果效。我相信神籍大小不同嘅事去陶造人嘅生命，而能夠得到ISCF嘅幫助正正係其中一樣。用另一角度睇，係因為ISCF係神裏面工作，人先會被影響。
