Catch 133 微光音樂—一個比人追夢嘅地方

一變三，三變四，四個「翹口摻手」嘅人就咁走埋咗一齊。一年多嘅時間裡，佢地經歷過無數次爭執又和解，有歡笑又亦有淚水。但係佢哋從來無後悔過，因為依個係佢哋嘅夢想。

上帝嘅恩典

音樂，令三個有相同理念嘅弟兄姊妹走埋一齊；而依段時間佢哋都經歷到神滿滿嘅恩典。記得微光初初開始嘅時候，三位成員John、回忠同Joyce都充滿熱誠，所有事都自己一手一腳包辦。然而，佢地好快意識到一個問題—微光欠缺一位專業嘅攝影師，以致所有嘅照片、MV都未能達到理想水平。佢哋不斷祈禱，希望上帝可以安排一位合適嘅人選比佢哋。好感恩，機緣巧合下佢哋認識左熱愛攝影嘅Yui，協助佢哋攝影同Planning嘅部份。

夢想

微光logo上有三粒星，代表住三位成員。值得留意嘅係，三粒星周圍嘅光線，其實係代表住一班被微光燃點嘅人。微光一直都好希望邀請到一班有心人，就算無經驗都唔緊要，只要有夢想，都可以喺微光嘗試尋找自己嘅定位。佢哋都希望一齊喺唔同領域有所發展，實現「微光世界」，一個屬於佢哋嘅舞台。

詩歌已死？

「人人在吃喝玩購  但我卻在怕何時餓死」

詩歌創作，唔單止無收入，仲要付出無數嘅心力、時間，甚至要自己貼錢製作。John同Yui坦言，拍攝MV最對唔住係一班義務嘅演員及工作人員。Budget唔多，只可以請佢哋食個飯、飲杯嘢。雖然演員們都好有心，但Yui希望他日微光有能力嘅時候，都可以好好報答返佢哋，「唔想待薄佢哋」。

而啱啱係大學畢業嘅John就表示，儘管如此，未來都希望全職喺微光工作，因為依個係佢嘅夢想，佢都希望可以為基督教音樂圈子出一分力。記得拍攝《詩歌已死》時認識咗好多前輩，作為主唱嘅John表示係當中學到好多嘢。除咗音樂技巧外，亦識到一班好好嘅前輩，好耐心咁教導佢，令佢覺得好溫暖。John都希望透過留意唔同音樂平台嘅創作，擴闊自己嘅眼界，並透過彼此交流學習，令基督教音樂更上一層樓。

未來走向

被問到微光未來嘅計畫，John同Yui都認為微光係一個充滿野心嘅平台，想喺多方面都有發展。佢哋依家都積極籌備緊一連串嘅新歌（請熱切期待吓），當中有詩歌，亦都有情歌、熱血Type嘅歌等等，可以話係跳出基督教詩歌既有嘅框框。

除左音樂，微光都希望以後可以發展成網絡平台，而且唔一定限於基督教創作。現階段佢地都製作緊唔同系列嘅內容，如Vlog，希望微光可以變得更加多元化，有更多嘅嘗試同突破。

（本文來自2021年DSE暑期門訓計劃中關於Detla Movement基督教文化運動的研究）

---

後記:

首先好感恩有機會訪問到Delta Movement嘅發起人同咁多位創作人，自己喺訪問同整理資料嘅過程中都有好大得著。回望自己一直以嚟嘅信仰生活都比較「單一」，思考及方式都好單一。

思考單一，無論係思考信仰問題，定係喺IG Page分享嘅內容都成日只用單一角度思考，好少嘗試多角度分析事情。聽完咁多分享後，發現一直都限制咗自己嘅思考，原來同一個問題可以有咁多角度去理解，都解決咗一啲存喺心內好耐嘅問題。

方式單一，服事原來並不限於教會，網絡亦係個好好嘅地方比你發揮恩賜服事。自己喺最近一年多都有嘗試於網絡上事奉，現實的確有無數不足嘅地方，但好感恩神畀我喺經營當中有好多特別嘅經歷，令我可以認識其他同路人，喺信仰路上彼此鼓勵。

最後，要多謝哩次計劃中識到嘅神隊友，記得嗰兩個禮拜不停訪問、整理資料、Present，雖然好匆忙，但感恩我哋係過程中都有互相分享扶持嘅時候，都係神好大嘅恩典～

好想同心郁郁想事奉嘅你講，唔好擔心自己所做嘅嘢好微小，小小嘅分享都可能影響到別人嘅生命，而且無論如何神都會欣賞你為佢所做嘅每一件事㗎♡

最後最後，請大家多多支持一班咁熱心為神作工嘅創作人;))

---

靖研
有點文靜，有點詞窮。
雖看不懂五線譜，但卻又很喜歡彈結他。
盼望成為一位愛思考靈命，藉恩賜祝福別人生命的敬拜青年。 

思濬
信二代，經歷過迷失，卻在迷途中深深經歷到神的愛。盼望在這漆黑絕望的都市見證神，將主愛帶到人群中。