Catch 135 動漫推介《我的英雄學院》
【英雄】/HERO/n/意思：_________________________
例句：英雄係一定要有披風的。
幪面、咸蛋、轉生、一拳、Marvel、Pixar、甚至叮噹，哪裡有悲劇，哪裡就需要英雄。
阿奎萊拉、巴魯坦星人、魔王、怪人、Thanos、博士、甚至剛田武（技安）⋯⋯裡有英雄、哪裡就需要反派。
咦？乜原來反派咁重要嘅咩！？假如無咗反派，英雄嘅故事就會失去張力 （俗稱：無戲做），英雄甚至會失業，然後社會Happy Ever After。若你同我一樣鍾意睇下英雄題材嘅故事，講到呢度應該會頹咗。人總會被定位鮮明嘅正邪對壘所激勵，有咩比得上兩粒鐘內見證邪惡被光明扭轉更大快人心？上一代嘅英雄故事，大概都離唔開呢個框架。不過當身處嘅世界愈來愈黑暗時，離地九丈遠嘅英雄光環開始大幅拋離現實，只夠換嚟得啖笑。哩個時候，另類嘅「英雄」故事開始掘起，而《我的英雄學院》（下稱《我英》）就係其中之一。
「過份的正義感，比邪惡更加可惡。」（節錄自殺手題材漫畫：《坂本日常》）
《我英》係一個「英雄普及」嘅社會，大多數人都擁有「個性」（即超能力），而英雄唔再係少數人自發嘅行為，而係受僱於政府嘅公務員。佢哋要透過唔同「正義彰顯」嘅行動換取人氣，以求接到更多委託，映射出一般人對一個正義使然嘅理想社會係點。之但係，過份嘅正義慢慢成為另類嘅法則。係正義嘅強光照射下，任何嘅異數就會被正邪哩個二分法，默然拒絕。被拒絕嘅異數，於強光下嘅陰影中不斷被扭曲，成為咗唔同嘅反派陣營，向「正義」反撲。比起聚焦打敗邪惡嘅快感，作者更畀力去刻畫「正義」嘅失陷、盲點，同埋由之而引伸嘅悲劇式邪惡。次次睇到以為正義將會反勝果陣，反派都可以因之前嘅「英雄」種下嘅正義「惡果」而走甩，都幾過癮。忽然諗起聖經好似都有類似嘅「正義聯盟」，果班捉個淫婦去耶穌面前嘅正義朋友，佢哋嘅個性唔通就係「投石」？
「One For All」 vs 「All For one」
《我英》玩嘢地將屬於英雄嘅超能力稱為「個性」，仲將主角Deku設定為社會嘅少數，個性係「無個性」嘅平凡人。雖然佢後來繼承咗No.1英雄嘅最強個性，但呢個由無變最強嘅原廠設定，同埋「個性」嘅雙重意義，將Deku放咗喺光明同黑暗嘅中間。佢對正邪有同常規唔同嘅理解同執著，好多時會看到「邪惡」嘅內心掙扎，同「反派」嘅悲傷共感、共鳴。佢不斷掙扎，拒絕輕易地以正義必須殺咗邪惡嘅二元理解作為行動的依歸，一啲都唔爽快，有時睇到我會好忟！
《我英》世界中，「邪惡」方最強嘅個性，名為「All For One」，故名思意係以搶奪其他人嘅個性，再化為己用，追求「一人獨大」型嘅強大個性。而「正義」方最強嘅個性，名為「One For All」，由歷代繼承者嘅本身嘅個性，累積傳承而成。無論係個性名稱，定係能力設定，想帶出嘅思想應該唔難明。
但哩種設定遇上資深嘅漫迷（即係筆者我），就會變成「車～根本就無分別，兩邊主角都係擁有多種能力嘅屈機人設啫。」而查實佢哋本身就係一句嘢嚟嘅！「One for all, all for one」係源於拉丁文格言「Unus pro omnibus, omnes pro uno」， 最初出現係十七世紀初，波希米亞新教徒嘅起義，後來又成為咗瑞士聯邦嘅傳統國家建國格言。而中文就譯咗做「我為人人，人人為我」，係粵語殘片《危樓春曉》嘅經典對白。
其實漫畫到咗後期，作者描繪嘅「One For All」重點唔在於「One」， 而係「ALL」。Deku需要深入地同歷代個性持有者溝通連結，先能夠掌握同使用啲個性。「One For All」嘅前代歐爾麥施話：「One For All 雖然強大，但Deku 還欠一樣很重要的東西。」而佢所指嘅就係「同伴＋群體」。Deku曾一度因為盲目追求一人獨大嘅正義而迷失，結果被同為英雄班嘅同學以集體嘅力量拉返嚟。「One」需要「All」，亦因「All」而強大。
英雄時代・時代英雄
「英雄」與「時代」兩者其實係互相影響：「時代」刻劃咗當下社群對正義嘅關注同渴求，「英雄」係哩啲願景嘅投射，然後社群又因為哩啲「英雄」慢慢塑造出心中嘅正義世界，一代又一代咁延續，一次又一次咁重構落去。
【英雄】/HERO/n/意思：_________________________________________________________________________________________________
你又會點填呢？
唔同嘅英雄故事承載住好多核心元素，其中一個係：「每個時代都有唔同嘅黑暗，但當中係有盼望嘅。」係哩個時代下創作出嚟嘅《我英》，裡面描繪嘅盼望，唔單止係「正義英雄」先有份，連果啲被世界被社會嘅罪所傷害嘅人，同樣都有份，係無個性嘅少眾都能夠彼此分嘗嘅盼望。黑暗中，完美無瑕嘅正義太遙遠、太刺眼啦。
我諗起《聖經》講嘅另一種畫面：
「我們有這寶貝放在瓦器裏，為要顯明這莫大的能力是出於神，不是出於我們。我們處處受困，卻不被捆住；內心困擾，卻沒有絕望；遭受迫害，卻不被撇棄；擊倒在地，卻不致滅亡。我們身上常帶著耶穌的死，使耶穌的生也在我們身上顯明。」（哥林多後書四章7-10節）
無個性嘅瓦器，卻繼承咗基督「One For All」哩個強大嘅個性。而所謂嘅強大，從來都唔在於無瑕，而係帶著基督嘅死，彼此憐憫，分嘗個份基督係我哋裡頭而有嘅盼望。而當我哋彼此分享微少嘅盼望同堅持時，每一個人就可能成為其他人生命中嘅無名英雄。