Catch 132 《再出發》

搞咗好耐,終於開完會,肯定返上次我哋宣教行程做出嚟嘅成果,仲決定畀我哋哩條team一齊再出發,去跟進返上次做落嘅嘢。

但點知未出發就鬧交,本身一組人,結果分道揚鏢變咗兩組人。更神奇嘅,我哋哩邊明明都只係諗住跟返上次果條路線,去探返上次見到嗰班人,但就不斷有阻滯。無端端班機被人取消咗,試下轉第二個方法又唔得,搞咗一大餐,問咗好多人,最後只可以去另一個地方,到咗就知道,果度有人有需要,我哋係應該去嘅。

我哋終於都唔駛咁迷失,喺新嘅地方,好多人都認同我哋嘅理念,又肯幫我哋,對我哋好好,甚至招呼我哋去佢屋企住。但太順利,原來我都係搞唔掂,終於有一次我踩到當地人條尾,佢哋搵人拉咗我哋。

如果得我,唔知我會唔會因為咁而頹咗呢?不過我哋係兩個一齊被人鎖,所以好似又定啲咁。我哋一齊唱詩祈禱,時間又好似易過啲。但,哩個時候居然會有地震,我哋個個都被人鎖住,如果棟嘢要冧,我哋全部都會走唔到,好大機會被壓死。之但係震完,我哋無事,反而係啲門同鎖都鬆開晒。其他囚友見到咁就即刻走,但我哋就無走到,覺得就咁走咗去都唔係辦法。因為我哋無走到,所以本來好絕望想自殺嘅守衛就無輕生,反而仲同我哋傾咗個好長嘅偈,甚至決定叫全家人都聽我哋講,全部信咗主。而我哋本來就無錯,所以第二朝就被人放返出嚟。一天都光晒,或者大家都覺得無事咁就繼續啦,但我哋唔服氣,明明都無錯,點解可以咁隨便就拉我哋,仲要坐咗一晚。我哋決定要投訴,但點知一投訴,就被人趕走,叫我哋唔好再留喺度。

之後,好似都係一直重複哩種行程。去一個新地方,一切好似好順利,但好快就又有人唔鍾意我哋,搵方法趕我哋走,我哋又只好去另一個地方,繼續重複又重複。就係咁,我哋去咗好多哋方,除咗地方名,同趕我哋走嘅原因唔同,其他都差唔多咁。但又無咁灰,一路上,認識到好多新嘅朋友,好多人支持我哋做緊嘅嘢,無論係錢,定係機會,唔同人都有唔同方法幫我哋。

世界變化得咁快,其實都唔知今次見完,下次仲有無機會見。不過,只要大家都係抱持同一種信念,我哋就係一齊,我哋就唔會怕同迷失。

新學年,好多新開始新事物,存在著某些未知嘅不安。因為無論升學定升班,身邊嘅同學仔、朋友仔總會唔同咗。而團契的團友、導師,甚至教會嘅牧者,可能會因為家庭或者工作嘅關係離開,身邊原本一齊行哩條信仰之路嘅人好似又少咗咁。但睇返保羅哩一段宣教嘅旅程,都覺得好神奇又好親切,雖然係好耐好耐之前嘅事,但原來聖徒相通唔係一啲會被地域年代所限,而係我哋喺聖靈嘅保守帶領下嘅連結。